Қаладағы логистикалық мүмкіндікті арттыру бағытындағы негізгі жобалардың бірі – қолданыстағы сауда-логистикалық орталығын кеңейту.
Шымкент қаласы оңтүстіктегі маңызды көлік тораптарының бірі ретінде көлік-логистика инфрақұрылымын дамытуға басымдық беріп отыр. Қала арқылы өтетін транзиттік бағыттар, теміржол торабы, халықаралық автожолдар мен әуежай өңірдің логистикалық әлеуетін арттыруға мүмкіндік береді, деп жазады Sn.kz ақпарат порталы.
Ұлттық статистика бюросының мәліметінше, 2026 жылғы қаңтар–тамыз айларында Шымкентте жүк айналымы өткен жылдың сәйкес кезеңімен салыстырғанда 1,3%-ға, ал жолаушылар айналымы 21%-ға өскен. Бұл ретте жылдың алғашқы айларында жүк айналымында төмендеу байқалғанымен, кейін көрсеткіш біртіндеп қалпына келген.
Қаладағы логистикалық мүмкіндікті арттыру бағытындағы негізгі жобалардың бірі – қолданыстағы сауда-логистикалық орталығын кеңейту. Үкімет мәліметінше, жоба Мемлекет басшысының Оңтүстік өңір үшін барлық тауарды қабылдап, жеткізуге қолайлы «Өңірлік хаб» құру тапсырмасы аясында жүзеге асырылып жатыр.
Логистикалық инфрақұрылымды дамытуда автомобиль жолдарының сапасы да маңызды. 2026 жылы Шымкентке қатысты республикалық маңызы бар жолдарда бірқатар жөндеу жобасы іске асырылуда. Оның ішінде «Шымкент–Қызылорда» автожолының 103 шақырымын қамтитын орташа жөндеу жұмыстары жоспарланған. Сонымен бірге қозғалысты автоматты бақылау жүйелерін енгізу көзделген.
Қала ішіндегі жол инфрақұрылымын жаңарту да жалғасып жатыр. 2025 жылы Шымкентте 323 көшеде жалпы 201 шақырым жолға орташа жөндеу жүргізілген. Сондай-ақ 17,1 шақырым жол мен бір көпірге күрделі жөндеу жасалған. Қаланың жол желісіндегі интеллектуалды көлік жүйесі де кеңейтіліп, бағдаршамдардың бір бөлігі орталықтандырылған басқару жүйесіне қосылды.
Әуежай инфрақұрылымын жаңғырту да қаланың логистикалық әлеуетін күшейтетін бағыттардың бірі. Қазір жаңа ұшу-қону жолағын салу жұмыстары жүргізілуде. Бұған қоса, Шымкент халықаралық әуежайын мультимодальды хаб ретінде дамыту жоспарланған.
Салаға бизнес тарапынан да қызығушылық артып келеді. Мәселен, қыркүйек айында «Шин-Лайн» компаниялар тобы мен Оңтүстік Кореяның Lotte Global Logistics компаниясы көлік-логистика саласында бірлескен кәсіпорын құру жөнінде келісімге келді. Жобаға шамамен 1 млрд теңге инвестиция салу жоспарланған. Компания 2028–2031 жылдары Алматы, Астана, Шымкент және басқа өңірлерге шығуды көздеп отыр.
Осы жобалар Шымкенттің көлік жүйесін тек қала ішіндегі қатынас тұрғысынан емес, өңірлік және халықаралық жүк тасымалы тұрғысынан дамытуға бағытталғанын көрсетеді. Логистикалық орталықтарды кеңейту, жолдарды жаңарту, әуежай инфрақұрылымын күшейту және цифрлық технологияларды енгізу қаланың транзиттік әлеуетін арттырудың негізгі тетіктеріне айналып отыр.