Оқиға орнында іздестіру-құтқару жұмыстары жалғасып жатыр.
Колумбияның оңтүстік-батысындағы заңсыз шахтада тау жыныстары опырылып, кемінде тоғыз адам қаза тапты.
Бұл туралы алғаш болып Нариньо департаментінің бейбітшілік және адам құқықтары мәселелері жөніндегі хатшысы Алекс Гонсалес хабарлады.
– Тау жыныстарының опырылуы салдарынан бірнеше адам үйінді астында қалғаны хабарланды. Олар шахтада жұмыс істеген. Қазіргі уақытта тоғыз адамның қаза тапқаны туралы мәлімет бар, – деді ол Caracol телеарнасының эфирінде.
Оқиға орнында іздестіру-құтқару жұмыстары жалғасып жатыр. Алайда аумаққа жетудің қиындығы мен қауіпсіздікке қатысты мәселелер құтқарушылардың жұмысына кедергі келтіріп отыр.
Caracol телеарнасының мәліметінше, қаза тапқандар саны 12-15 адамға жетуі мүмкін.
Алтын заңсыз өндірілген шахта Санта-Барбара муниципалитетінде орналасқан.