Қорғаныс министрлігіне қатысты ескі бейнежазба қайта таралуда.
Әлеуметтік желілерде әскери ант қабылдау рәсімі кезінде сарбаздың басы айналып, өзін жайсыз сезінген сәті түсірілген бейнежазба қайтадан таралып жатыр. Алайда бұл оқиға биыл емес, 2024 жылы Аягөз гарнизонында болған, деп хабарлайды Sn.kz ақпарат порталы.
Қорғаныс министрлігінің мәліметінше, “сарбаздың жағдайы қатты толқығандықтан нашарлаған. Оның денсаулығына қауіп төнбеген. Медициналық көмек дер кезінде және толық көлемде көрсетілген”.
Жалған ақпаратқа қарсы іс-қимыл орталығына белгілі болғандай, аталған әскери қызметші мерзімді әскери қызметін толық өтеп, кейін запасқа шығарылған.
Демек, қазір әлеуметтік желілерде таралып жатқан бейнежазба қазіргі жағдайға қатысты емес. Оқиғаның болған уақыты мен мән-жайын көрсетпей, архивтік кадрларды қайта жариялау аудиторияны жаңылыстырып, қоғамда негізсіз алаңдаушылық туғызуы мүмкін.
Орталық блогерлер мен жаңалықтар пабликтерін ақпарат таратқанда жауапкершілік танытып, жарияланатын мәліметтердің шынайылығына көз жеткізуге шақырады.
Көрінеу жалған ақпаратты қасақана тарату заңнамаға сәйкес құқықтық жауапкершілікке әкеп соғуы мүмкін.