$ 446.49 € 475.38 ₽ 4.79
Сенбі күні Кубада Ан-26 жолаушылар ұшағы апатқа ұшырады. CiberCuba интернет-порталының мәліметінше, бортта болған адамдардың барлығы қаза болды.
ТАСС агенттігі NTN24 телеарнасына сілтеме жасап хабарлауынша, Баракоа қаласынан ұшып шыққан Aerogaviota кубалық әуе компаниясының ұшағы аралдың батыс бөлігінде орналасқан Пинар-дель-Рио қаласы аумағында радардан жоғалып кеткен. Aerogaviota авиакомпаниясы ұшақтың апатқа ұшырағанын растады. Шетелдік БАҚ-тардың бірі әуе көлігінде 39 адам болғандығын және 8 адамның қаза болғанын хабарласа, CiberCuba порталы оқиға салдарынан тірі қалғандар жоқтығын жазуда.
Порталдың хабарлауынша, ішкі рейсті жүзеге асырмақ болған ұшақтың сынықтары Гаванадан батысқа қарай 80 шақырым жерде, Лас-Ломас-де-Сан-Кристобаль аталатын туристік аймақтан табылды. Ұшақ бортында кімдердің болғаны белгісіз. Кубаның ресми билігі оқиғаға қатысты әзірге ешқандай ақпарат таратпады.
Дерекөз: Қазақпарат
