«Полиция мәжбүрлеген болар»: Денис Тенді өлтірді деген күдіктінің қызы жігіттің өмірде ақкөңіл адам екенін айтты

Оның айтуынша, ол Нұралы Қиясов тұрған Жамбыл облысының Мерке ауылының жанындағы ауылда тұрған. Екеуі үш жылдан астам уақыт бойы романтикалық қарым-қатынаста болған.

«Мен оны 10 жылдан астам уақыт бойы танимын. Көңілді, бай отбасынан шыққан адам мұндайға бара алмайды деп ойлаймын. Оның анасы мектепте жұмыс істейді. Үлкен ағасы ауыл шаруашылығымен айналысса, кіші бауыры - студент. Ол толыққанды отбасынан шыққан адам. Достары да жақсы адамдар. Ол мектеп бітірген соң Мерке ауданындағы колледжге түскен», - дейді ол.

Ол Нұралы Қиясовтың ата-анасының шаруа қожалықтары бар екенін, сондай-ақ ажырасып кеткендерін, әкесі басқа әйелге кетіп қалғандығын айтты.

«Біз үш жылдай кездестік. Оның оғаш қылықтарын байқаған жоқпын. Ол қызуқанды емес, тыныш, сабырлы адам. Достарымен керісіп, тіпті төбелесіп қалған кездері болған, бірақ бірінші болып кешірім сұрайтын», - дейді ол.

Ол қайғылы оқиға бойынша айыпталуына байланысты өз нұсқасын айтты.

«Полиция қызметкерлерінің әдістері көп. Мүмкін оны мәжбүрлеген болар. Екеуміздің ортақ достарымыз көп. Ол бұлай еткен жоқ, бұл кездейсоқтық деп ойлаймыз. Шуды тоқтату үшін осылай істеді деп ойлаймыз», - дейді ол.

Ол Нұралы Қиясов Алматыға 18 жасында көшіп кеткенін, экспедитор, тауар бойынша кеңесші болып жұмыс істегенін айтты.

«Ол ауылға келіп-кетіп жүретін. Колледж бітірген соң Алматыға кетті. Жарты жылдан кейін ауылға қайтып келіп, бір жылдай болды да, қайтадан Алматыға кетті», - дейді ол.

Қыз Нұралы Қиясовтың істі болғаны туралы білмейді.

«Мен оның көлік жүргізу куәлігі болғанын білемін. Ол куәліктен үш жылға айырылып қалған. Ал істі болғаны туралы білмеймін. Онымен соңғы рет бір ай бұрын сөйлескем. Мені Алматыға шақырды. Мен уақытым жоқ екенін, жұмыс істеп жүргенімді айттым. Мен оның кінәлі екеніне сенбеймін. Халық оның ата-анасын балағаттап жатыр, ал ата-ананың бұл іске қатысы жоқ», - дейді ол.

Дереккөз: БАҚ