Дәрігерлер СҚО-да көлік қағып, бір аяғын жұлып кеткен азаматтың жағдайы туралы айтты

№3 қалалық аурухананың травматолог дәрігері Уәли Бедешевтің айтуынша, 28 жастағы ер адамның сол аяғы жұлынып қана қоймай, бас-сүйек мидың жабық жарақатын алып, маңдай аумағы жараланған. Оң жақ жамбас сүйегі сынып, көп қан жоғалтып, травматикалық шок, көптеген жарақат алған. Қазір ол жан сақтау бөлімінде жатыр.

«Аурухананың жан сақтау бөліміне жатқызылды. Қазіргі уақытта жағдайы ауыр. Науқас есін біледі. Өзіне айтылған сөздерді де түсінеді. Жағдайы тұрақталғаннан кейін травматология бөліміне ауыстырылатын болады», – дейді Уәли Бедешев.

Дәрігер науқастың аяғын аман алып қалу мүмкін болмағанын айтады. Оның аяғының қан тамырлары мен жүйке талшықтары зақымдалған.

Ер адам ауруханаға жеткізілген кезінде есін біліп жатқан. Өзін қала көшелерінің бірінде көлік қағып кеткенін айтыпты.

Дәрігерлер ер адамның өзіне келуіне қанша уақыт қажет екенін айтуға ерте дейді.