Қызылордада 14 жастағы жасөспірім суға батып кетті

Қызылорда қаласы аумағындағы Қараөзек стансасы маңындағы каналға шомылмақ болған 14 жастағы жасөспірім суға батып кетті, деп хабарлайды ҚазАқпарат тілшісі. 

Ол 2005 жылы дүниеге келген. Жасөспірім Қараөзек стансасындағы №128 негізгі мектепте 7 сыныпта оқиды. Дәл осындай жағдай Байқоңыр қаласында тіркелді. Аталмыш қаладағы №272 мектептің 2 сынып оқушысы Сырдария өзенінің рұқсат етілмеген аумағында суға түсіп, тілсіз жаудың құрбанына айналды. 

Қызылорда облысында жыл басынан бері 5 адам суға кеткен. Оның екеуі бала. Былтыр дәл осындай жағдайдан 22 адам көз жұмса, оның 8-і жасөспірімдер. 

Облыстық Төтенше жағдайлар департаментінің басшысы Омар Бержановтың айтуынша, қауіпсіздік ережелері сақтала бермейді. Ересектер балаларды қараусыз қалдырады. Сондай-ақ, облыста талапқа сай келетін жағажайлар санаулы. Оның бірі Шиелі ауданы аумағында тіркелсе, қалған екеуі Қызылорда қаласында орналасқан.