$ 449.3  489.69  4.89

«Теледидар маған, тоңазытқыш саған»: экс-судья адам шошырлық оқиғаларымен бөлісті

Бұрынғы судьяның айтуынша, ажырасқан ерлі-зайыптылар мүлік бөлісу туралы талап-арызбен көп жүгінеді.

Жасұлан Нұрмахамбетов – заңгер, Павлодарда екі жыл судья қызметін атқарған. Негізінен отбасылық істерді қараған, деп жазады Sputnik Қазақстан. Ол қазақстандықтардың сотқа қандай арыз-шағыммен жүгінетінін айтты.

"Теледидар маған, тоңазытқыш саған"

Бұрынғы судьяның айтуынша, ажырасқан ерлі-зайыптылар мүлік бөлісу туралы талап-арызбен көп жүгінеді. Кейбірі, тіпті, шанышқы-қасық үшін де қырқысатын көрінеді.  

"Бір шаңырақ астында қайғы мен қуанышты бөліскен ерлі-зайыптылардың осындай әрекетін көргенде, ойға қаласың. Күлкілі емес, аянышты көрініс. Сонша жыл бірге тұрып, ажырасқаннан кейін бір-бірін жек көріп кететініне таңғаласың. Қатты аяймын. "Теледидар маған, тоңазытқыш саған" деп саудаласып тұрады", - дейді Нұрмахамбетов.

Кейбірі пәтерді бөліскен кезде, сатып, ақшасын бөліп алады. Немесе баспананы бағалап, бірі бала-шағамен сол үйде қалады, ал екіншісі ақшаны алады.

"Пәтердің бөлмелерін бөліп алып, ажырасқаннан кейін де бірге тұратындар бар. Бірақ, асхана, дәретханасы ортақ болғаннан кейін, артынан шу шығып, тағы соттасып жатады", - дейді әңгімесін жалғастырған заңгер.

Айтуынша, әр сот кемінде алты айға созылады.

"Мүгедек әкесінен бас тартты"

"Бірде сотқа жетпістегі мүгедек әке жүгінді. Дәрі алуға ақшасы жоқ. Балаларынан алимент өндіре алмаған. Балалары "әпермейміз" деп ат-тонын ала қашты. Міне, осындай да оқиға болған", - дейді ол.

Әкесі қызын неге сотқа берді

Нұрмахамбетов ең алғаш сотқа жұмысқа кірген кезде, өзі қатысқан процесті еске алды. Бұл әке мен қыздың соты екен.

Заңгер тағы бір жаға ұстатарлық оқиғамен бөлісті.

"Бір ер адамның әйелі ауырып қайтыс болған. Әлгі кісі жалғыз баласын қанаттыға қақтырмай, тұмсықтыға шоқтырмай өсірген. Барлық жиған-терген дүниесін ұлының оқуына жұмсайды. Әлемдегі беделді оқу орнына – Гарвардқа жібереді. Баласы шетелдегі оқуын тәмамдап, елге келіп, жақсы жұмысқа орналасады. Кейін үйленіп, балалы-шағалы болған. Бірақ әкесін қарттар үйіне тапсырып жіберген. Сонда әкесінің айтқаны ғой: "Мен балама бәрін беріппін, тек бір-ақ нәрсені ұмытып кетіппін. Дұрыс тәрбие бермеппін", - деп әңгімеледі Нұрмахамбетов.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары

Тегтер:

#сот