Орал әуежайы ғимаратының құрылысы жарты жылға созылуы мүмкін, деп хабарлайды ҚазАқпарат.
«Орал» ӘКК» ҰК» АҚ басқарма төрағасы Дияс Жәнібековтің айтуынша, биыл шілдеде басталған ғимаратты қайта салу жұмысын алдағы жылдың күзінде аяқтау көзделген болатын.
Алайда бұзу жұмыстары кезінде ғимараттың іргетасы қатты отырып кеткені анықталды.
«Осыған байланысты жобаны қайта нақтылау қажеттігі туындады. Қазір осы жұмыстар жүргізілуде. Сол себепті құрылыс мерзімі алты айға ұзарып, шамамен 2021 жылдың көктеміне дейін созылуы мүмкін», деді Д.Жәнібеков.
Салынғанына қырық жыл болған аталмыш ғимарат содан бері жөндеу көрмеген болатын. Оны қайта жаңғырту құны 3,2 млрд теңгеге бағаланған еді. Ғимарат іске қосылған кезде аумағы анағұрлым кеңейеді.
«Орал» халықаралық әуежайы» ЖШС бас директоры Хайретдин Расқалиевтің сөзіне қарағанда, қазіргі кезде жолаушылар өтіп жатқан ғимарат өте тар болғандықтан әуе рейстері соған сәйкестендірілді. Яғни кептеліс болмас үшін рейстер арасы кемінде екі сағатқа ұзартылды.