Төсекке таңылған зейнеткерлерді «тонаған» кім?

Ақтөбеде қарттар мен мүгедектер үйінде тұратын ардагерлердің зейнетақысы ұрланған. Орталықтың әлеуметтік қызметкері зейнеткерлердің ақшасын алуы мүмкін деген күдікке ілінді, деп хабарлайды өңірдегі KAZ.NUR.KZ.

Қарттар үйіндегі былықты прокурорлық тексеріс ашқан. Қазір күдікке ілінген маман қызметтен шеттетілді.

«Ол әлеуметтік қызметкер бізде 2011 жылдан бері жұмыс жасайды. Тексеріс жүріп жатқандықтан, бұл жағдайға біз пікір білдіре алмаймыз. Дегенмен, ол маман уақытша жұмысынан шеттетілді.

Қарттарымыздың көпшілігі зейнетақысын іштегі банкомат арқылы алады. Пошта қызметі арқылы алатындар да бар. Өздігінен жүре алмайтындарға әлеуметтік қызметкер бекітілген. Мекемеде алты әлеуметтік қызметкер бар», - дейді директордың әлеуметтік жұмысы жөніндегі орынбасары Сән Нұрышева.

Ақшасынан қағылған жәбірленушілердің бірі - Анатолий Кузубов. Қария әлеуметтік орталықтың байырғы тұрғындарының қатарында екен.

«Зейнетақымды алуға интернаттың әлеуметтік қызметкерлері көмектеседі. Банк картамның пайдалану мерзімі бітуге таяғанда алмастыруға алып кетті. Әкелген кезде құпия сан жазылған қағаз ашық болды. Кейін покуратурадан келген адамдар менің зейнетақы алатын картамды суретке түсірді», - дейді интернат тұрғыны Анатолий Кузубов.

Оқиғаның болғанын растаған прокурорлар әлеуметтік қызметкерге қатысты сотқа дейінгі тергеп-тексерудің басталғанын хабарлайды.

«Ақтөбе қаласының Алматы ауданы прокуратурасымен №1 әлеуметтік қызмет көрсету орталығына» тексеру жүргізіліп, нәтижесінде бірқатар заң бұзушылықтар анықталған. Тексеру қорытындысы бойынша материалдар жинақталып, сотқа дейінгі тергеп-тексеру басталды. Істің нәтижесі қосымша хабарланады», - дейді облыстық прокуратураның баспасөз қызметі.

Қазір әлеуметтік орталықта 223 адам тұрады. Оның 96 -сы І және ІІ топ мүгедегі. Олардың ең жасы - 30-дан асса, үлкені - 96 жастағы тыл ардагері.

Көпшілігі мемлекеттен жәрдемақы мен зейнетақы алады. Шамасы келгендер ақшаны банкоматтан өздері алса, шамасы жетпейтіндерге әлеуметтік қызметкерлер көмектеседі екен. Бүгінгі жағдайда қанша ардагердің зардап шеккені белгісіз.