Ел «Пирамида» атап кеткен Бейбітшілік және келісім сарайында бірнеше күннен бері су жоқ. Дәретханалар кілттеулі. Мәселенің мән-жайын білу мақсатында ғимараттың бас инженеріне қоңырау шалдық. Алайда, ол бізге жауап беруден үзілді-кесілді бас тартты, деп жазады «Айқын» газеті.
Қас қылғанда, бас инженердің өзі аты-жөнін айтып еді, диктофонға анық жазылмай қалыпты. Шаруасы басынан асып жатыр ғой, мазалай бермейік деп, қабылдау бөлмесіне қоңырау соғып, бас инженердің аты-жөнін сұрадық. Қызық осы тұста басталды, қабылдау бөлмесіндегі қыз бас инженердің аты-жөнін айтпаймын деді. Арадағы әңгіме төмендегіше өрбіді:
– Ол сізге жауап берген жоқпын деді, мен атын айта алмаймын. – Бас инженердің аты-жөні құпия ақпаратқа жатпайды, неге жасырасыз? – Мен сізге директорды қосайын, – деп оңай құтылды.
Директордың міндетін атқарушы Ділбар Әмірова бас инженердің журналистерден қатты қорқатынын мойындады.
Директормен әңгіме: – Бас инженер мән-жайды сұрайық десек, ешқандай ақпарат бермеймін деп жатыр. – Қорқады. Бәрі журналистерден қорқады. – Неге қорқады? Судың жоқ екені рас па деген бір ғана сұрақ қойылды. Ол «возможно» деді. – Ойымды дұрыс жеткізе алмай қаламын ба деп қорқады. Екінің бірі сауатты сөйлей алмайды ғой, түсініңіз, оның үстіне, ол – инженер. Құбыр желісінен басқаны білмейді. – Сауатты сөйлеуге мамандықтың қатысы жоқ. Дәл қазіргі уақытта дәретханаға бара алмай отыр жұрт. – Дәретхананың бәрі ашық, ыстық су бар, тек суық су жоқ. Түстен кейін сағат 4-5-те барлық қабатта су беріледі.
Директор осылай деді, ал «Астана су арнасының» апатты жою қызметі басқаша жауап қатты: – Бейбітшілік және келісім сарайында бірнеше күннен бері су жоқ, неге? – Авария болып жатыр. Аварияға байланысты су беру тоқтатылды. – Су қашан беріледі? – Белгісіз...