Атамбаевқа «Адам өлтірді» деген айып тағылды

Қырғызстанның бұрынғы президенті Алмазбек Атамбаев Мемлекеттік ұлттық қауіпсіздік комитетінің "Альфа" арнайы жасағы командирінің орынбасары Усенбек Ниязбековтің өлімі бойынша күдікке ілінді, деп жазады Азаттық.

13 желтоқсанда Қырғызстан ішкі істер министрі Қашқар Жунушалиев Атамбаевты "Адам өлтіру" бабы бойынша күдікке ілінгені туралы хабардар еткенін айтты.

7 тамызда арнайы жасақ пен полиция Кой-Таш ауылында арнайы операция ұйымдастырып, Атамбаевты тергеуге әкетпек болған. Кой-Таштағы үйінде бекініп алған Атамбаев пен оның жақтастары орган өкілдерімен атысқан. Атыс кезінде Усенбек Ниязбеков оққа ұшқан еді.

ІІМ Жунушалиевтің сөзінше, сараптама кезінде Ниязбековке Атамбаевтың атына тіркелген мылтықтан оқ тигені анықталған.

8 тамызда Атамбаев тілшілерге Қой-Таштағы резиденциясында өзінде ғана мылтық болғанын, арнайы жасақпен атыс кезінде оқты өзі атқанын айтқан.

Елдің ІІМ Атамбаевты бірнеше ауыр қылмысқа айыпты деп танылып, ұзақ жылға сотталған Азиз Батукаевты 2013 жылы түрмеден заңсыз босатуға байланысты істе тергеуге шақырылған. Бірақ Атамбаев тергеуге барудан бас тартқан. Кейін арнайы жасақ операция ұйымдастырған. 8 тамызда Атамбаев полицияға берілген.

8 тамызда Қырғызстанның күштік құрылымдары Алмазбек Атамбаевты ұстады. Кейін Атамбаевқа "тәртіпсіздіктер ұйымдастыру", "заңсыз қару айналымы", "тергеуге кедергі жасау", "кепілге адам алу", "кісі өлтіру" және "адам өлтіруге оқталу" баптары бойынша 14 айып тағылып, қамауға алынды.

Қазір сот жүріп жатыр. Атамбаев өзіне тағылған айыптарды жоққа шығарады.