Көліктің терезесінен тұрғынға оқ атқан жігіт ұсталды

Түркістан облысының полицейлері тұрғынды атып, жарақаттаған жас жігітті ұстады, – деп хабарлайды Skifnews.kz ақпарат порталы Polisia.kz-ке сілтеме жасап.

Түлкібас аудандық полиция бөлімшесіне Т.Рысқұлов ауылының жедел-жәрдем диспетчерінен ауруханаға қару оғынан дене жарақатын алған жергілікті тұрғын түскені жөнінде хабарлама келді.

Оқиға орнына Түлкібас аудандық полиция бөлімшесінің жедел-тергеу тобы шықты. Жәбірленушіден жауап алу барысында, ол достарының үйінен шығып, көшеде келе жатқанында жанына нөмірсіз, сұр түсті “Меrcedes” маркалы көлігі тоқтап, терезесінен оқ ата бастағанын көрсетті. Содан санына оқ тиіп, салдарынан жарақаттанған.

Аталған жайт ҚР Қылмыстық кодексінің 293-бабымен (бұзақылық) тіркеліп, сотқа дейінгі тергеп-тексерудің бірыңғай тізіліміне енгізілді. Полицейлер осы қылмысты жасаған күдіктіні анықтау мақсатында шұғыл әрекетке кірісті. Оқиға орнын мұқият қарап, тексеріп, көрген-білгендерден жауап алып, іздестіру жұмыстары жүргізілді. Тәртіп сақшылары жинақталған ақпарат көздері арқылы күдіктіні анықтап, 12 сағат ішінде ұстады. Ол көрші ауылдың тұрғыны, жас жігіт болып шықты.

Тергеуші Еркін Сәбитбектің анықтауынша, күдікті жарақат алған жәбірленушіні бұрыннан араздасып жүрген азаматқа ұқсатып, кек алу мақсатында оқ атқан. Ол өз кінәсін толық мойындады. Күдіктіден тіркелмеген 16 калибрлі екі ұңғылы аңшы қаруы айғақты зат ретінде тәркіленіп алынды.

Қазіргі уақытта күдікті Түлкібас аудандық полиция бөлімшесіне уақытша ұстау изоляторына қамауға алынды. Сотқа дейінгі тергеу амалдары жүргізіліп жатыр.