«Елбасының алдағы уақытта да мемлекетімізге үлкен пайда әкелетініне сенімдімін» - Тоқаев

Қазақстан президенті Қасым-Жомарт Тоқаев Елбасыны 80 жылдық мерейтойымен құттықтады, деп хабарлады Elbasy.kz сайтына сілтеме жасаған Skifnews.kz ақпарат порталы.   

Сайтта жарияланған фотодан мемлекет басшысының мерейтой иесіне бір шоқ раушан гүлін тапсырғанын көруге болады. Қазақстанның тұңғыш президенті де, президент де қазіргі карантин талаптарын сақтап, бетперде киіп алған.

"Бүгін тарихи күн – Елбасымыздың 80 жылдығы. Ол – қазақ халқының ұлы қайраткері, ұлы перзенті. Бүкіл әлем солай деп санайды. Елбасы шын мәнісінде ұлы адам, біз бұл туралы айтуымыз керек. Әрбір халық өзінің көрнекті тұлғаларымен танымал және әрбір халық өзінің тарихи қайраткерлерімен мақтануы керек", - деді Тоқаев.

Қазақстан президенті Елбасының халықаралық дәрежедегі беделін де ерекше атап өтті.

"Нұрсұлтан Назарбаев заманауи мемлекет құрды, әлем картасында Қазақстанның шекарасын шегендеді. Бұл туралы біздің Елбасымызға қоңырау шалып, құттықтап жатқан әлемнің барлық көрнекті саясаткері айтып жатыр. 80 жас – әр адамның өміріндегі маңызды меже. Мен Нұрсұлтан Назарбаевқа ұзақ ғұмыр тілеймін. Елбасының алдағы уақытта да біздің халқымызға, мемлекетімізге үлкен пайда әкелетініне сенімдімін", - деп атап өтті Тоқаев.

Президентпен бірге Елбасыны ұлттық қауіпсіздік комитетінің төрағасы Кәрім Мәсімов пен "Самұрық-Қазына" ұлттық әл-ауқат қорының басшысы Ахметжан Есімов те құттықтап барды.