$ 448.89 € 477.93 ₽ 4.76
Құрылыс жүргізіп, инженерлік желілерді тарту барысында жауын-шашын кәріздері мен коллекторларды да ұмытпаған жөн. Оларды тазартып, қараусыз қалған жауын-шашын кәріздері мен арық жүйесін балансқа алып, жауын-шашын құбырларына заңсыз жалғануды анықтап, т.с.с. жұмыстарды жоспарлы түрде жүргізу керек. Бұл туралы елорда әкімі Алтай Көлгінов Instagram парақшасында ақпарат жариялады.
Жарты жыл ішінде өткізу қабілетін жақсарту мақсатында 54 шақырым коллектор, 4 мың қақ суын жинау және қадағалау құдығы, 32 мың погон-метр арық жүйесі тазартылды. Арықтар мен құдықтардан шығарылған қоқыстың өзі 2,5 мың тоннаны құрады, жасалған мұндай жұмыстар жетіп-артылады. Жауын суы ағатын құбырларға 230 үй-жайдың заңсыз жалғанғаны анықталды. Бұл жұмыстар тұрақты атқарылып келеді.
Бүгінгі аралау барысында «Жастар» ауданындағы (Тәшенов пен Амман көшелерінің қиылысы) тазарту қондырғысының құрылысымен таныстым. Бұл құрылыс келіп тұрған жауын-шашын коллекторларының реконструкциясын да көздейді. Бұл жобаны біз екі кезеңде жүзеге асырамыз.
Бірінші кезеңі - былтырғы күзде басталды. Бұрын қалдық су өзенге тікелей ағызылып, оны ластап, қала экологиясына кері әсерін тигізетін. Жоспарымыз жүзеге асқан соң, енді жаңбыр мен қар суы Есілге ағызар алдында тазартылатын болды.
Биылғы көктемде бұл жоспардың екінші кезеңін аяқтаймыз. Нәтижесі - келіп тұрған жауын-шашын коллекторларының реконструкциясы болмақ. Жаңа қондырғылардың қуаты тәулігіне 42 мың текше метр болады. Бұл қондырғылар Тәшенов, Бараев, Уәлиханов, Иманбаева және Республика даңғылын суға кетуден сақтайды.
Қондырғылар жер астымен жүргізіліп, ал үстіне - кіші архитектуралық мүсіндермен көмкерілген әрі жасыл желекті сквер саламыз.
Сонымен бірге, Б. Момышұлы көшесіндегі айтулы проблемалы жерге жауын-шашын кәріз жүйесінің магистралдық коллекторының құрылысы аяқталды. Жаңа қондырғы қазіргі жауын-шашын кәріздерінің өткізу қабілетін 1,5 есеге арттырады.
Тельман тұрғын алабының тазарту қондырғылары мен магистралды коллекторының өткізу қабілеті тәулігіне 36 мың текше метр. Жоба жүзеге асқан соң - осы алаптың және № 27 көшенің құрылыс жүруі мүмкін аумақтарынан қақ суын ағызып әкету мүмкін болады.
