Елімізде банктердің, айырбастау пункттері мен сақтандыру ұйымдарының жұмыс режимі өзгерді

Қазақстан азаматтарының өмірі мен денсаулығын қорғау және COVID-19 таралуының алдын алу мақсатында Ұлттық банк пен Қаржы нарығын реттеу және дамыту агенттігі қаржы нарығы субъектілерінің жұмыс режимі туралы бірлескен бұйрықты жариялады, деп хабарлайды Stan.kz ақпарат агенттігі.

19 қаңтардан бастап төмендегі ұйымдарға онлайн-режимде барынша қызмет көрсетуді қамтамасыз ету талап етіледі:

Екінші деңгейдегі банктер, Қазақстанның резидент емес банктерінің филиалдары,
айырбастау пункттері,
ипотекалық ұйымдар,
сақтандыру ұйымдары,
сақтандыру брокерлері,
бағалы қағаздар нарығында брокерлік қызметті жүзеге асыратын ұйымдар,
микроқаржы ұйымдары, кредиттік серіктестіктер, ломбардтар,
төлем ұйымдары,
коллекторлық агенттіктер.
"Эпидемиологиялық жағдайды бағалау матрицасына сәйкес өңірлерде қызметті жүзеге асыратын:

"қызыл аймақ" – өндірістік қажеттілік болған кезде филиалдың штат санының кемінде 40 пайызы қашықтан жұмыс нысанына ауыса алатын филиалдарды қоспағанда, қызметкерлердің жалпы штат санының кемінде 60 пайызын қашықтан жұмыс нысанына ауыстыруды қамтамасыз ету;

"сары "және" жасыл " аймақтар бойынша – өндірістік қажеттілік болған кезде қызметкерлердің кемінде 30 пайызы қашықтан жұмыс нысанына ауыса алатын филиалдарды қоспағанда, қызметкерлердің жалпы штат санының кемінде 50 пайызын қашықтан жұмыс нысанына ауыстыруды қамтамасыз етсін", - делінген бұйрықта.

Банктерге клиенттермен жұмысты ұйымдастыруды және банкоматтардың, терминалдардың, интернет-банкингтің, мобильді банкингтің және клиенттердің банктік шоттарын қашықтан басқарудың басқа жүйелерінің, инкассаторлық қызметтің, call-қызметтің, төлем карталарын жеткізу қызметінің, сондай-ақ олардың қалауы бойынша басқа қызметтердің үздіксіз жұмыс істеуін қамтамасыз ету тапсырылды.

Бұдан басқа, айрықша қызметі банкноттарды, монеталарды және құндылықтарды инкассациялау болып табылатын банктер мен заңды тұлғаларға экономика субъектілері мен халықты қолма-қол ақшамен жабдықтау жөніндегі, оның ішінде банкоматтарды қолма-қол ақшамен уақтылы толтыру және олардың үздіксіз жұмыс істеуі жөніндегі үздіксіз қызметті жүзеге асыруды қамтамасыз ету тапсырылды.

Бірлескен бұйрық Қазақстанның Бас мемлекеттік санитариялық дәрігерінің қаулысында көзделген шектеу шаралары мен іс-шаралардың күші жойылғанға дейін қолданылады.