Алматыда жанармай бекетіне қарақшылық шабуыл жасағандар ізін суытпай ұсталды деп хабарлайды қалалық полиция департаментінің баспасөз қызметі.
Шабуыл бүгін 26 ақпанда таңғы сағат 04:00 шамасында жасалған.
Полицияның мәліметінше, қара бетперде таққан екі жігіт Жетісу ауданында орналасқан жанармай құю бекеттерінің біріне кіріп, бірі бірден тапаншаны шығарып, кассир-операторға бағыттаған. Сөйтіп олар ақшаны алып, қылмыс орнынан жаяу қашып кеткен. Жедел-іздестіру шаралары барысында 20 мен 24 жас аралығындағы үш жігіт ұсталған.
Олар Түркістан облысының тумасы болып шыққан.
Қазір барлық күдікті қамауға алынған. Аталмыш факті бойынша Қылмыстық кодекстің 192 бабы, 2-бөлігі бойынша сотқа дейінгі тергеу амалдары жүргізілуде. Құзырлы органның дерегінше, күдіктілер мүлкі тәркіленіп, 5 жылдан 10 жылға дейін бас бостандығынан айырылуы мүмкін.
"Ұсталғандар Алматы қалалық полиция департаментінің уақытша ұстау изоляторына орналастырылды. Олар кассадан 135 мың теңгені алып шыққан", - дейді Жетісу аудандық полиция басқармасы бастығының міндетін атқарушы подполковник Асхат Дәулетияров.