Аптап ыстық болады: бірнеше облыста ескерту жарияланды

Синоптиктер күннің қатты ысуына байланысты еліміздің бірнеше өңірінде ескерту жариялады, деп хабарлайды «Қазгидромет».

26 мамырда күндіз Ақтөбе облысының кей жерлерінде найзағай ойнайды, желдің бағыты оңтүстіктен солтүстік-батысқа ауысады, екпіні 15 м/с болады. Кей жерлерінде 38 градусқа дейін қатты ыстық, өте жоғары өрт қаупі сақталады.

26 мамырда Қызылорда облысында шығыстан соққан жел солтүстік-батысқа ауысады, күндіз күші кей жерлерде 15 м/с жетеді. Сондай-ақ 40 градус қатты ыстық және өте жоғары өрт қаупі күтіледі.

26 мамырда Қарағанды облысының кей жерлерінде найзағай ойнайды. Күндіз кей жерлерде 38 градус қатты ыстық сақталады. Солтүстік-шығыстан оңтүстік-шығысқа жел ауысады, күндіз күші кей жерлерде 15-20 м/с жетеді.

26 мамырда күндіз Ақмола облысында кей жерлерде найзағай, бұршақ болады, оңтүстік-батыстан, батыстан соққан желдің күші 15-20 м/с, 37 градусқа дейін қатты ыстық болады.

26 мамырда күндіз Атырау облысында кей жерлерде 38 градус қатты ыстық, өте жоғары өрт қауіпі сақталады.

26 мамырда тәулік бойы, 27-28 мамырда күндіз Жамбыл облысында найзағай ойнап, бұршақ жауады. 26-28 мамырда кей жерлерде солтүстік-шығыстан соғатын жел оңтүстік-батыс желіне ауысады, күші 15-20, екпіні 25 м/с жетеді.  

26 мамырда Қостанай облысында найзағай ойнайды. Күндіз кей жерлерде дауыл, шаңды дауыл соғады, оңтүстік-батыстан соғатын жел солтүстікке ауысады, күші 15-20, екпіні 23 м/с жетеді. 35-38 градус қатты ыстық сақталады.

26 мамырда Батыс Қазақстан облысында жел солтүстік-шығыстан соғады, кей жерлерде 15-20 м/с күтіледі.