Қостанай облысында үш бозбала жол апатынан көз жұмды

Қостанай облысында екі көлік бетпе-бет соқтығысты. Жол апатынан үш бала қаза тапты, деп хабарлайды Azattyq Rýhy Sputnik Қазақстанға сілтеме жасап.

Облыстық полиция департаментінің мәліметінше, қайғылы оқиға Қостанай-Қарабұтақ тас жолында болған.   

«Renault SANDERO мінген 36 жастағы әйел жүк көлігін басып озбақшы болған. Сөйтіп, жолдың қарсы бетіне шыққанда Lexus-пен соқтығысқан», - дейді полицейлер.  

Renault-та болған үш жасөспірім – 14 жасар екі бала және 17 жастағы бір жасөспірім оқиға орнында көз жұмды. Ал көлік жүргізушісі және оның жанында отырған 40 жастағы жолаушы дене жарақатын алды.  

Қазіргі кезде Қылмыстық кодекстің 345-бабы (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы, абайсызда екi немесе одан да көп адамның өлiмiне әкеп соққан іс-әрекет) бойынша сотқа дейінгі тергеу шаралары басталды. Осы бапқа сәйкес, белгілi бiр лауазымдарды атқару немесе  қызметпен айналысу құқығынан жеті жылға дейiнгi мерзiмге айыра отырып, бес жылдан он жылға дейінгі мерзімге бас бостандығынан айыру жазасы қарастырылған.