Қазақстандық QazVac вакцинасы Қырғызстанда ресми түрде тіркелді, деп хабарлайды ҚазАқпарат тілшісі.
Бұл туралы Денсаулық сақтау министрі Алексей Цой Facebook парақшасында мәлім етті.
«QazVac Қырғызстанда ресми тіркелді», - деп жазды министр.
Еске салсақ, QazVac вакцинасының 25 мың дозасы Қырғызстанға гуманитарлық көмек ретінде жеткізілген болатын. Осыдан бір ай бұрын Президент Үкіметке QazVac-ты экспорттау мәселесін пысықтауды тапсырған еді. Ал әлемге танымал The Lancet журналында «QazVac» вакцинасы туралы мақала шықты.
«The Lancet журналы отандық «QazVac» вакцинасын клиникалық зерттеудің 1-2 фазасының нәтижелері туралы мақаланы қабылдап, электрондық нұсқасын басып шығарды. Биологиялық қауіпсіздік проблемаларының ғылыми-зерттеу институтының ғалымдарын мақаланың жариялануымен құттықтаймын!», - деген болатын Білім және ғылым министрі Асхат Аймағамбетов.