Шымкентте әжейге дөрекілік танытқан полицейлерге қызметтік тексеру тағайындалды

Базар алдында жаңғақ сатып отырған әжейге дөрекілік танытқан тәртіп сақшыларына қатысты қызметтік тексеру тағайындалды. Қалалық полиция департаменті шенді қызметкерлер тәртіптік жауапкершілікке тартылатынын мәлімдеді, деп хабарлайды Express Qazaqstan.

Оқиға Әл-Фараби ауданының аумағында белгіленбеген орындарда жасалатын заңсыз сауда фактілерінің алдын алу мақсатында жүргізілген рейдтік іс-шара барысында болған.

Бейнежазбада көрсетілген Әл-Фараби АПБ-ның қызметкерлеріне қатысты қызметтік тексеру тағайындалды. Тексеру жұмыстары аяқталғаннан кейін, аталған полиция қызметкерлері тиісті тәртіптік жауапкершілікке тартылатынын хабарлаймыз, -деп жазылған Шымкент қалалық ПД берген түсініктемеде.

"Қырғы базары" алдында жаңғақ сатып отырған әжейге дөрекілік танытқан полицейлер туралы бұған дейін Express Qazaqstan хабарлаған. Тәртіп сақшыларының бұл әрекеті көптің ашуын тудырды.