Нұрдәулет Бексұлтан: Қымбат көлік сыйлайтын жағдайым бар, бірақ қазір әкем жоқ

Қазақстандық блогер Нұрдәулет Бексұлтан алғаш рет отбасы жайлы айтты. Жас жігіт блогерлікке қандай себеппен келді? Әкесінің артынан қалған 30 миллион теңге қарызын қалай өтеді? Әкесінің екі әйелінен тараған балаларымен араласа ма? Анасының қайта тұрмыс құруына қарсы емес пе? Блогердің өзі баяндап берді, деп жазады Stan.kz. 

Қазақ тілді блогер Нұрдәулет Бексұлтанны негізгі мамандығы фелдьшер. Мемлкеттік басқару ісі. Үш дипломы бар. Алайда мамандығына сай қызмет атқармайды. Басқа салада қызмет етіп үлгеремін, блогерлікке қазір келмесем, кеш болады дейді ол. 

“Әкем ерте өмірден озды. Әкемнің екі әйелі болған. Әкемнен тірі кезінде ақша сұрайтынмын. Анам әкеңнен ақша сұрамай-ақ қойшы, ертең міндет қылады дейтін. Бірде мен 500 мың керек деп әкемнен сұрадым. Бизнес бастау үшін берді. Бірақ қайтарасың деді. Мен әкемді міндет қылып тұр екен деп ойладым. Намысқа тырыстым. Солай екі айда қайтардым. Сол кезде әкем ақшаны алмады. Маған жай ғана мотивация берген екен. Мен жұмыс істеу үшін, дайынға ие болмау үшін үйреткен екен. Қазір әкемнің әр ісін қарап, үлгі аламын. Кезінде дұрыс істемеген екенмін деп ойлаймын. Әкемнен кешірім сұрағым келеді”, – дейді Нұрдәулет. 

Блогер жігіт әкесінің орны ерекше екенін айтады. Әкесі көз жұмған күні 20 жастан 40 жасқа есейіп кеткенін мойындайды. 

“Әкем өмірден өткеннен кейін қарыздарымыз болды. 25 миллион теңге қарыз 30 миллион теңгеге жетті. Анам ұйықтай алмады. Солай маған бірнәрсе істеу керек болды. Құрылыста, фельдшерлікте жүрсем оны өтей алмасымды білдім. Ал блогерлікке қазір келмесем, кейін кеш болады деп ойладым. Солай блогерлікке келдім. Қарыздарымыздан құтылып жатырмыз. Қазір 6 млн теңгедей қалды. Мен блогерлікті зерттеп, қазақ тілін сәнге айналдырамын деген мақсатпен келдім. Оны жасадым да. Қазір ел танып қалды. Жұмысым жүріп жатыр. Ақша бар. Жағдайымыз оң. Әкеме қымбат көлік сыйлайтын жағдайым бар, бірақ әкем жоқ. Осының бәрін көргенде ғой деп армандаймын. Әкем бала күнімде сен қымбат көлік аласың деп маған күш беретін. Құдай аузына салған шығар”, – деді Нұрдәулет.

Ол арнайы Мәскеуге барып, 6 ай тұрған. Әр қаласын аралап, қазақ тілін сәнге айналдыру, қазақ тілді контент құру мақсатында блогерлермен танысқан. Елге керегін әкеп, өз мақсатына пайдалана білді.

“Мен орыс тлін білмеймін. Орыс тілді қазақтар қазақ тілділерді менсінбейді. Өз елімізде өзімізді менсінбейді. Бұны жолға қою керек болды. Қазір көп жас қазақ тілінде сөйлеп жүр. Тіпті орыс блогерлердің өзі қазақша сөйледі. Қарапайым қазақпын. Қарапайымнан үлкен жетістікке жетуге болады. Бастысы момын болмау керек. Көп ұйықтамау керек. Әкемнің бір сөзі бар. “Кедей болар балаңның ұйқысынан біл” деген. Бір жерде көп отырмаймын. Жылы жерде жата берсең, жаман үйреніп қаласың. Адамдар кейде сыйластықты қорқақтыққа балайды. Біреуді сыйласаң, қорқып тұр деп ойлайды. Сондықтан момын болмау керек”, – деді ол. 

Айтуынша әкесінің екі әйелі болған. Бір әкеден 6 бала қалды.

“Әкемнің екі әйелі болғанын мақтан тұтамын. Екі әйелі болу оңай шаруа емес. Сондықтан мақтан етем. Әкемнің бір әйелінен екі ұлы бар. Араласып тұрамыз. Анамды әкем бар кезде де қызғанатынмын. Кейін де қызғандым. Біреумен сөйлесе қалса, қызғанатынмын. Қазір есейдім. Егер арқа сүйер азамат тапса, қарсы болмас едім. Кім де болса бақытты болуға лайықты. Тұрмыс құрам десе, еш қарсылық білдірмеймін”, – деді Бексұлтан. 

Блогерді басы бос. Болашақта арманы – үлгілі отбасы болу. Жақсы жар табу. 

`Әйеліме қоятын талабым көп. Сол үшін де кездеспей жүрген шығар. Кейін өкініш болмайтындай жақсы әйел тапқым келеді. Ғашық болып көрмеппін. Анамды сыйласа, мені сыйласа болды. Менің жалғыз анам бар. Оның көңілінен шығу керек. Анамды Меккеге жібердім. Түрлі сыйлықтар алып бердім. Халықтың ризалығын көріп, анам маған риза болады. Соның өзі бақыт. Енді келін алып, немере сүйсе деймін. Анамның бақытты өмір сүргенін қалаймын. Әйелдің бақыты күйеуінің разылығында. Күйеуіне бағынған әйел бақытты болады”, – деді Нұрдәулет.