Жаңалықтар 12.01.2022 сағат 20:38

Алматы облысында ХҚКО қызметкерлері бас көтерді

Олар орталықтың жабылуына қарсы.
Алматы облысында ХҚКО қызметкерлері бас көтерді
Фото: azattyq-ruhy.kz
Бөлісу
Бөлісу
Бөлісу

Алматы облысында Халыққа қызмет көрсету орталығы жабылғалы жатыр. Салдарынан тек штаттық режимде жұмыс істейтін 44 қызметкер жұмыссыз қалады, деп хабарлайды Azattyq Rýhy.

Қарасай аудандық мамандандырылған ХҚКО жұмыс істейтін мамандар бүгін бас көтеріп, басшылыққа қарсылығын білдірді. Олардың сөзінше, бастықтар екі ай бойы қысым көрсетіп, барлығына жұмыстан өз еркімен кету туралы арыз жазуды талап еткен көрінеді. Жаңа жылдан соң жұмысқа шыққан қызметкерлеге ХҚКО жабылатынын мәлімдепті.

«Бүгін бізді жұмысқа шақырып алды да, өз еріктеріңмен жұмыстан кетіңдер деп талап қойды. Басқа ХҚКО ауысу туралы өтініші жазыңдар деп қулыққа барды. Шындығында бізге басқа жерден жұмыс орын ұсынып отырған жоқ. Біз олардың талабы заңсыз, орынсыз деп қарсылық білдірдік. Екі ай болды қысым көріп келеміз. Бізді жұмыстан кетірудің себебі айтылмайды, тек ауызша орталық жабылады деп қана айтты. Құжат жүзінде көрсете алмайды, біз міне бүгін тағы қарсылық білдіріп жатырмыз», - деді Алматы облысы Қарасай аудандық ХҚКО маманы Шынар Сәрсенбаева.

Орталыққа келіп, қажетті қызмет, көмек алатын адам саны көп. Мемлекеттік мекеме Қарасай ауданы ғана емес, автокөліктерді тіркеу бойынша облыс көлемінде қызмет көрсетеді. Көлік тіркеудің транзиттік нөпірі көп болғандықтан орталық 2019 жылы ғана ашылған еді. Тұрғындарға мұнда қызметтің 17 түрі көрсетіледі. Жаңа орталық қажетті құрылғылардың барлығымен жабдықталған. Мемлекеттік корпорация қызметкерлері клиенттерге ыңғайлы болу үшін коммерциялық банктердің кассалары мен мультикассаларын, көлік қоятын тұрақты да ашқан.

«Құрметті үкіметтегілер, біздің облыстағы мына жағдайға көңіл аударыңыздар. Мен өз ауданымыздағы осы орталыққа келіп, көлігімді тіркейін десем, олар бұл жердің жабылғанын айтты. Қажетті мемлекеттік төлемдерді жасадық, кезекке де тұрып, жұмысымызды бітірейік десек, бізге қызмет көрсетуден бас тартты. Облыстық орталықты жабуды қалай түсінуге болады? Біздің мәселемізді шешіп беріңдер», - деді Қарасай ауданының тұрғыны Расул Камалов.

Қымбатшылық қысқан сәтте жұмыстан қуылып жатқан қызметкерлер отбасын қалай асыраймыз деп бас қатырып отыр. Олардың сөзінше, Алматы облысы ХҚКО келетін адамдардың саны жағынан республика бойынша бірінші орында. Алматыға жақын Іргелі ауылындағы орталықтың ғимараты жалға алынған. Штаттан тыс жұмысшыларды қоса алғанда елуден астам адам осы жерде нәпақасын тауып отыр.

«Басшылық ресми құжат көрсетпейді, тек қысым көрсетіп келеді. Бізді кінәлі етіп, жоғарыға хат жібермек. Шындығында, Қызмет көрсету орталығының жалға алынған ғимаратына төлейтін ақша жоқ. Оны да жасырады бізден. Қалаға, басқа жаққа ауысыңдар дейді, бізге ол жақтан жұмыс орнын тауып қойғандай. Президент бірінші кезекте халықтың әлеуметтік проблемасына мән беріп, әлеуметтік мәселелерін шешіңдер деген жоқ па? Оны мына басшылық неге тыңдамайды?» - деді ашынған қызметкерлер.

Ал мамандандырылған Халыққа қызмет көрсету орталығының жетекшісі Хайдар Әкімбаев арыз жазбаған мамандарды қорқытып қана қоймай, боқтап-балағаттауға көшкен. Оның сөзінше, 2 мың шаршы метр ғимаратта орналасқан орталықты жабу туралы шешімді «Азаматтарға арналған үкімет» мемлекеттік корпорациясы» коммерциялық емес акционерлік қоғамының басшысы қабылдаған. 

«ХҚКО жабылсын деген шешімді мен қабылдаған жоқпын, оны Нұр-Сұлтандағы басшылар шешкен. Жабылсын деген хат енді келеді. Қызметкерлер жұмыссыз қалмайды. Орталыққа 300-500 адам аралығында күнделікті дайын құжаттарды алуға келеді. Қызметкерлердің жалақысы сақталады, Қаскелеңге немесе өзге де орталықтарға ауыса алады. Басқа жақтағы ХҚКО-да орын болса шешіп береміз, оның бәрі бір күнде шешілмейді. 2021 жылдың 26 қазанынан бастап осы орталыққа басшы болып тағайындалдым. Мен қол астымдағы қызметкерлерді балағаттаған жоқпын», - деді Алматы облысы Қарасай ауданы мамандандырылған ХҚКО жетекшісі Хайдар Әкімбаев.
 

Sn.kz порталының басқа да маңызды жаңалықтарын InstagramTelеgramfacebooktwitter және vk секілді әлеуметтік желідегі парақшаларымыздан оқи аласыздар.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар