$ 446.49 € 475.38 ₽ 4.79
Көлік полициясы Алматы әуежайында қоғамдық тәртіпті қадағалау бойынша қосымша шаралар қабылдады, деп хабарлайды ҚазАқпарат.
Алматы қаласы әуежайындағы желілік полиция бөлімінің бастығы Талғат Тәліповтың айтуынша, әуежайдағы көлік сақшылары күшейтілген режимде жұмыс істеп жатыр.
Полицейлер қоғамдық тәртіп пен жүктерді сақтауға, сондай-ақ іздестіруде жүрген тұлғаларды анықтауға баса көңіл бөлуде.
«Жеке құраммен жолаушыларға барынша көмек көрсетуге бағытталған тиісті нұсқамалар жүргізілуде. Авиациялық қауіпсіздік қызметі өкілдерімен бірлесіп, металл іздеу құрылғылары арқылы тексеріс жүргізіліп жатыр. Қазір терминалға кіруге тек ұшатын жолаушыларға рұқсат берілген. Жолаушылар мен олардың жүктері тексеріледі», - деді ол.
Осыған байланысты ол жолаушылардан полиция қызметкерлерінің олардың құжаттарын тексеру кезіндегі әрекеттеріне түсіністікпен қарауын сұрайды.
«Тыйым салынған заттарды сақтау, тасымалдау әрекеті әкімшілік және қылмыстық жауапкершілікке әкеп соқтыратынын атап өткім келеді», – деді Талғат Тәліпов.
Бұдан басқа шетел азаматтарының және азаматтығы жоқ тұлғалардың ҚР көші-қон заңнамасы талаптарын сақтауына бақылау күшейтілген.
«Қазіргі уақытта еліміздегі санитарлық-эпидемиологиялық жағдайдың жақсармай, керісінше, күн сайын СОVІD-19 диагнозы расталған тұлғалардың саны артып отырғанын қаперге аламыз. Осыған қарай, азаматтарға әуежайлар мен басқа да қоғамдық орындарда қауіпсіздік шараларын сақтауларын, жеке қорғану құралдарын қолдануларын сұраймыз», – деп қосты ол.
Sn.kz порталының басқа да маңызды жаңалықтарын Instagram, Telеgram, facebook, twitter және vk секілді әлеуметтік желідегі парақшаларымыздан оқи аласыздар.
