Елордада белгісіз біреу сауда орталығына «мина қойған»

Тексеріс барысында жарылғыш және өзге де күмәнді заттар табылған жоқ.

Нұр-Сұлтан полициясы "Сарыарқа" сауда ойын-сауық орталығында "бомба" бар деп жалған хабар таратқан ер адамды іздестіріп жатыр.

29 наурыз түсте "Сарыарқа" сауда орталығының жұмыс нөміріне белгісіз ер адам телефон соғып, 8 минуттан кейін жарылыс болатынын хабарлаған. Әкімшілік дереу полиция шақырды.

"Оқиға орнына шұғыл қызметтер аттанды. Тексеріс барысында жарылғыш және өзге де күмәнді заттар табылған жоқ", - деп мәлімдеді елорданың полиция департаменті.

Сауда орталығының ғимаратынан 350 адам эвакуацияланған.

Қазір бұл фактіге қатысты Қылмыстық кодекстің 273-бабы "Терроризм актiсi туралы көрiнеу жалған хабарлау" бойынша сотқа дейінгі тергеу басталды. Бұл бап бойынша шығынды өтеумен 5 жылға дейін бас бостандығынан айыру жазасы көзделген.

Қазіргі таңда полиция бомба туралы хабарлаған адамды іздестіріп жатыр.

sputnik.kz