Абай облысына қандай аудандардың кіретіні белгілі болды

Жаңа әкімшілік-аумақтық бөлініс бүгін, 6 сәуірде өткен облыстық мәслихаттың кезектен тыс сессиясында талқыланған.

Сонымен, алдағы уақытта ШҚО шекарасы 97,8 мың шаршы шақырым болып, оған Өскемен мен Риддер қалалары, сондай-ақ Глубокое, Зайсан, Қатонқарағай, Күршім, Самар, Тарбағатай, Ұлан, Шемонаиха, Алтай аудандары енбек. Облыстың әкімшілік орталығы Өскемен болып қала береді.

«Орталығы Семейде құрылатын Абай облысы 185,5 мың шаршы км аумақта орналасады және Семей мен Курчатов қалаларын, сондай-ақ Абай, Аягөз, Ақсуат, Бесқарағай, Бородулиха, Жарма, Көкпекті, Үржар аудандарын қамтиды», – делінген деректе.

Еске сала кетсек, бұған дейін Жетісу мен Алматы облыстары қалай бөлінетіні мәлім етілді. Ендігі кезек Қарағанды облысынан өз еншісін алатын Ұлытау өңірінде болып тұр.