Талдықорғанда жүргізушілер мейрам күні балаларды тегін тасымалдаудан бас тартқан

Талдықорғандықтар автобус жүргізушілерінің Халықаралық балаларды қорғау күнінде балаларды тегін тасымалдаудан бас тартқанына шағымданды, деп хабарлайды Stan.kz ақпарат агенттігі.

Тұрғындар тарапынан автобус жүргізушілерінің үстінен шағым түсті. Жұмыс күнінің соңына қарай әкімдік парақшасында автобустардың бірінің жүргізушісінің кешірім сұраған видеосы пайда болды.

"WhatsApp мессенджеріндегі хабарламаларды оқымадым. Бізге балалар үшін тегін болатыны туралы айтылған екен. Мен мұндай ақпаратты естіген жоқпын, бұл оқиға үшін Талдықорған халқынан кешірім сұраймын", – деді жүргізуші.

Әкімдік балалардан жол ақысын талап еткен қоғамдық көліктің жүргізушілері анықталып, түсіндірме жұмыстары жүргізілді деді және сәйкесінше ескертулер берілгенін мәлімдеді.