Атырауда жемқорлықпен ұсталған 48 адамның сегізі ғана қамалып, 35-і айыппұлмен құтылған

Оның ішінде білім саласында 15, ал денсаулық сақтау мекемелерінде 13 дерек тіркелген.

Атырау облысында соңғы 1,5 жылда мемлекет кірісіне 1,1 млрд теңге қайтарылды, деп хабарлайды ҚазАқпарат.

Сыбайлас жемқорлыққа қарсы іс-қимыл агенттігі Атырау облысы бойынша департаментінің басшысы Ерлан Досановтың мәліметінше, сотқа дейінгі іс жүргізу шеңберінде мемлекет кірісіне 1,1 млрд теңге өтелген. Бұл - келген залалдың 96% құрап отыр.

«Сотқа дейінгі тергеп-тексеру желісі бойынша жұмыстың басты критерийі – азаматтардың конституциялық құқықтарын бұзу фактілеріне жол бермеу, қылмыстық істерді қосымша тергеп-тексеруге қайтару, соттың сыбайлас жемқорлық құрамынан сыбайлас жемқорлық құрамына сыбайлас жемқорлықты қайта саралау. Сондай-ақ, мерзімді тоқтату және тоқтату туралы қаулылардың күшін жоюды барынша азайтып, қылмыстық процестің үш буынды моделін іске асыру шеңберінде процестік шешімдерден бас тарту да бар», -дейді Ерлан Досанов.

Оның айтуынша, биыл азаматтардың конституциялық құқығының бұзылуына жол берілмеген.

«Соңғы бір жарым жыл ішінде сыбайлас жемқорлыққа қатысты 82 қылмыстық іс өндіріспен аяқталды. Қылмыстық істің 63-і сотқа жолданды. Бұл істер бойынша кінәлі деп танылған 48 адам сотталды. Оның 8-іне бас бостандығынан айыру, 35-іне айыппұл түріндегі, ал 5-еуіне өзге жаза тағайындалды. Сотқа дейінгі іс жүргізу шеңберінде мемлекет кірісіне 1,1 млрд теңге немесе келген залалдың 96% өтелді», -деп мәлім етті Ерлан Досанов.

Департамент қызметкерлері мемлекеттік сатып алу веб-порталына мониторинг жүргізіп, тауарлар мен қызметтерге бағаны жасанды түрде көтеретін сала анықтаған.

Оның ішінде білім саласында 15, ал денсаулық сақтау мекемелерінде 13 дерек тіркелген.

«Мемлекеттік сатып алу веб-порталына жүргізілген тұрақты мониторингтің қорытындысымен берілген ұсыныстарымыз бойынша 1,5 млрд теңгеден астам қаражат үнемделді. Асыра бағалау фактілері 103 мемлекеттік органда анықталды. Осындай мониторингтің нәтижесінде мемлекетке залал келмеді. Мемлекеттік сатып алу саласындағы қылмыстық құқық бұзушылық деңгейі 6 есе төмендеді», -дейді департамент басшысы.