$ 449.58  486.94  4.86

«Әрқайсысынан 700 мың теңгеден жинап алды»: Алматыда 60 адам Оңтүстік Кореяға барамыз деп алданып қалды

Қомақты қаражатты жинап алған фирма басшылары екі айдан бері телефонға жауап бермейді, кеңсеге келсе есік ашпайды екен.

Оңтүстік Кореяға бармақшы болған 60-тан астам адам сан соғып қалды. Өйткені Корея республикасына кіруге электронды рұқсат алып береміз деген "Easy Visa" компаниясы уәдесінде тұрмаған, деп хабарлайды "Хабар 24" арнасы.

Әр адамнан 700 мың теңгеден жинап алған фирма жұртты бірнеше айдан бері сандалтып жүр. Таңғы шық елінен күдер үзгендер енді компанияға берген ақшасын қайтара алмай әлек.

Екі айдан бері құрғақ уәдені қанағат тұтып келе жатқан тұрғындар туристік фирманың табалдырығын тоздырып жүр.

Компания мамыр айында 60-тан аса адамның әрқайсысынан 700 мың теңгеден жинап алған. Маусымда дайын болады деген құжаттан әлі хабар жоқ.

"Мен өзіме, келіншегіме 1 млн 336 мың теңге бердім. Енді бұл аз ақша емес, өзім бес тиынсыз 7-8 ай жұмыссыз болғам. Сол жұмыс таппағандықтан Кореяға кетуім керек болған. Енді сол кредитке алған ақшаны салып, мына жақтан кредит қысып жатыр, ал Кореяға аттандыруға тиіс кісі жоқ", - дейді жәбірленуші Рахат Майлыбаев.

Адамдарды алдап соққан компанияның ғаламторда арнайы парақшасы бар. Онда шет елге виза ашу жолдары туралы бірнеше бейнеролик жарияланған. Көбі осы жарнамаға және жазбаша келісімшартқа алдандық дейді.

Қомақты қаражатты жинап алған фирма басшылары екі айдан бері телефонға жауап бермейді, кеңсеге келсе есік ашпайды екен. Шыдамы таусылған жәбірленушілер қалалық полиция департаментіне арыз жазған. Қазір "Easy Visa" компаниясына қатысты іс қозғалды.

"Аталған азаматтардың арызы Алматы қалалық полиция департаментінде тіркеліп, қылмыстық істі жүргізу үшін Алмалы аудандық полиция басқармасына жөнелтілді. Ол жақта арыз соталды бірыңғай тізілімінде Қылмыстық кодекстің 190-бабына сәйкес алаяқтық дерегі бойынша тіркеліп, қазіргі таңда тергеушілер бұл істі өз өндірісіне алды", - дейді қалалық полиция департаментінің ресми өкілі Салтанат Әзірбек.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары