Жаңалықтар 20.09.2022 сағат 17:40

ҚазМұнайГаз «Самұрық-Қазынадан» «Қашағанның» 50% үлесін сатып алды

Бұл – «ҚазМұнайГаз» үшін соңғы жылдардағы ең ірі сатып алу мәмілелерінің бірі.
ҚазМұнайГаз «Самұрық-Қазынадан» «Қашағанның» 50% үлесін сатып алды
Бөлісу
Бөлісу
Бөлісу

«ҚазМұнайГаз» ұлттық компаниясы акционерлік қоғамы «Самұрық-Қазына» акционерлік қоғамынан «ҚМГ Қашаған Б.В.» ЖШЖК компаниясындағы 50% үлесін сатып алды, деп хабарлайды «ҚазМұнайГаз» баспасөз қызметі.

2022 жылы 15 қыркүйекте «ҚазМұнайГаз» ҰК АҚ (ҚМГ) 2015 жылы жасалған Опциондық келісім аясындағы өз құқығын пайдаланып, «Самұрық-Қазына» АҚ-дан (Қор) Солтүстік Каспий жобасы (Қашаған жобасы) бойынша Өнімді бөлу туралы келісімнің 16,88% тиесілі «ҚМГ Қашаған Б.В.» ЖШЖК компаниясындағы 50% үлесін 3,8 млрд АҚШ долларына сатып алған.

«Бұл – «ҚазМұнайГаз» үшін соңғы жылдардағы ең ірі сатып алу мәмілелерінің бірі. Қашаған жобасындағы үлесі артуы арқылы ҚМГ-ның шоғырландырылған өндіру, EBITDA, таза пайда және активтер көрсеткіштері жақсарады. Бұл ретте компанияның қарызы да артады. Сатып алу үшін төлем ҚМГ Қашаған Б.В. ақша ағымдарының есебінен жүзеге асырылады деп жоспарлануда», - деп хабарлады ҚМГ Басқарма төрағасының орынбасары Дәурен Қарабаев.

2015 жылы ҚМГ түскен қаражатты сол жылдары мұнай бағасының күрт төмендеуіне байланысты ҚМГ еурооблигацияларындағы «Таза қарыз/ EBITDA <= 3.5х» қаржылық ковенантының бұзылуына жол бермеу мақсатында қарызды азайтуға пайдалану үшін ҚМГ Қашаған Б.В. компаниясындағы 50% үлесін Қорға сатты.

ҚМГ-ның қаржылық жағдайын жақсарту бойынша жүргізілген жұмыстар қазіргі сатып алуды жүзеге асыруға сеп болды. Бұл осы мәмілені кредиттік рейтингтерге әсер етпей іске асыруға мүмкіндік берді.

Қаржылық жағдайды жақсарту үшін жасалған іс-шаралар миноритарлық акционерлермен келіссөздер жүргізуді және «ҚазМұнайГаз «Барлау Өндіру» АҚ-дағы үлесін шоғырландыруды, ҚМГ-ның жария борышындағы ковенантты пакетті оңтайландыруды, сондай-ақ ҚМГ ақша ағымдарына сәйкес ұзақ мерзімді өтеу кестесін құруды қамтыды. Атап айтқанда, ҚМГ еурооблигацияларымен жасалған бірқатар мәмілелер нәтижесінде ковенанттық пакеттен «Таза борыш/ EBITDA <= 3.5х» қаржылық ковенанты толығымен алып тасталды.

Жүргізілген жұмыс нәтижесінде ҚМГ-ның жалпы қарызы шоғырландырылған аудиттен өткен қаржылық есептілікке сәйкес 2014 жылдың соңындағы жағдай бойынша 19,2 млрд АҚШ долларынан 2022 жылдың бірінші жартыжылдығының соңында 8,4 млрд АҚШ долларына дейін азайды. ҚМГ Қашаған Б.В. үлесін сатып алу мәмілесі аяқталғаннан кейін ҚМГ-ның жалпы қарызы шамамен 10,7 млрд АҚШ долларына жетеді.

Халықаралық рейтинг агенттіктері осы кезең ішінде ҚМГ-ның жеке кредиттік рейтингін арттырып, компанияның қаржылық жағдайы жақсарғанын атап өтті.

Бұған дейін ҚМГ Қашаған Б.В. компаниясының 50% үлесіне алдын ала шектеу қойылған еді, оны биыл Гаага (Нидерланд) Апелляциялық соты алып тастады. Бұл шешімге қатысты Нидерланд Жоғарғы сотына түскен шағым ҚМГ-ның 50% үлесін сатып алу туралы мәмілесіне әсер етпейді, өйткені Апелляциялық соттың шектеуді алып тастау туралы шешімі дереу күшіне енеді.

Мәміле туралы толығырақ «ҚазМұнайГаздың» қаржылық есебінде баяндалатын болады.

 

 

 

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар