150 жылдық мерейтой: Қостанай облысында Ахмет пен Міржақыптың ескерткіші ашылды

Киелі Торғай төрінде ұлт ұстазы Ахмет Байтұрсынұлының 150 жылдық мерейтойы өтті. Бұл игі іс-шара Мемлекет басшысы Қасым-Жомарт Кемелұлы Тоқаевтың айрықша назарында екені белгілі. Соған байланысты Президентіміздің тапсырмасымен Ахаңның тойын елмен бірге атап өту үшін ҚР Сенат төрағасы Мәулен Әшімбаев өңірге арнайы келді, - деп хабарлайды Қостанай облысы әкімдігінің баспасөз қызметі.

Мерейтой аясында Торғай ауылында осы топырақтан түлеп шыққан Ахмет Байтұрсынұлы мен Міржақып Дулатұлына арналған ескерткіш ашылды.

Екі арыстың әдеби музейі мен Ахаңның музей-үйі де көпшілікке таныстырылды. Осы ретте жыл басынан бері ұлт ұстазының мерейтойына орай ауқымды жұмыс атқарылғанын, елдімекендерге, көшелерге, нысандарға есімі беріліп, 12 томдық шығармалар жинағы жарық көргенін атап өткен жөн.