Астанада бос жұмыс орындар жәрмеңкесіне жұмыс іздеп келген мұғалімдер жалақынының көлемінен жағаларын ұстады

Жансейіт Меңкенов география пәнінің мұғалімі. 7 жылдық тәжірибесі бар. Ол сол күйі ақшасы отбасын асырауға жететіндей жұмыс таба алған жоқ. Жалпы, бүгінгі шараға 60 компания қатысып, 500-ден астам жұмыс орнын ұсынған екен. Арасында құрылыс компаниялары, жиһаз жасайтын цехтар, қонақ үйлер, балабақша мен мектептер бар.

Жансейіт Меңкенов, Астана қаласының тұрғыны:

- Еркекте намыс болу керек қой. Бала-шағасын қалай асырайды 40-50 мыңға? Сіз ағылшын тілін білу керексіз дейді. Ағылшын тілінде беретін мұғалімдерді қайдан табады, оны мен түсінбеймін? Болашақ мұғалімдерге ол талаптарды қоюға болады. Бұрыннан келе жатқандарды далаға лақтырып жібере ме?

Жұмыс іздеп келушілердің көбі жастар. Зейнеткерлер мен үйде бос отырып қалған әйелдерді де кездестіруге болады. Ресми есеп бойынша, тек Астанада 5 мыңға жуық жұмыссыз бар. Елордада қазір ұстаз, дәрігер мен құрылысшылар жетіспейді. Ал жәрмеңкеге қатысып жатқан мекемелердің арасында ірі холдинг, ұлттық компаниялар мүлдем жоқ. Ұсақ-түйек компаниялар ұсынған жалақы өте аз.

Аяжан Айтжанова, Астана қаласындағы Халықты жұмыспен қамту орталығының баспасөз хатшысы:

- Құрылыс саласындағы мекемелер 80-90 мың теңге жалақы ұсынады. Білім беру саласы 50-ден 100 мың аралығы. Ірі компаниялар мұндай жәрмеңкеге қатыса бермейді. Бірақ ара арасында болады. Ол үлкен ұлттық компанияларға осындай шараларға қатысу тиімді емес.