Неге айтасың? Журналистерге ауыл проблемасын айтқан ақсақалға қастандық жасалды

Ауылда өткен жиналыстың ертесінде Дүйсенбек Сазанбекұлын үш ер адам жергілікті телеарнаға сұхбат беріңіз деп үйінен алдап әкетіпті. Зейнеткерді көлікке мінгізіп алғаннан кейін жас жігіттер күш көрсетіп, телефонын тартып алған деп мәлімдейді КТК телеарнасы.

Қаланың сыртына апарып, «Ақпарат құралдарына ауылдағы проблемаларды айтып неге сұхбат бересің?» -деп қоқан-лоқы көрсеткен көрінеді.

Әбден қорқып қалған ақсақалды жігіттер айдалаға тастап, өздері көліктеріне мініп тайып тұрған.

«Жетпіске келгенде мұндай қорлық көрдім. Ұрып өлтірмесе де, намысыма тиді. Бәйдібек ауданының құрметті азаматымын. Намысыма тиіп одан да бауыздап өлтіргені жақсы еді. Жас балалардың айтқандарын бәрін айта алмаймын ғой, моральный қорлау болды»,-дейді ОҚО Бәйдібек ауылының тұрғыны Дүйсенбек Сазанбекұлы.

Үйіне әрең жеткен ақсақал қазір ем қабылдап жатыр. Ал, осы оқиға бойынша полицейлер қылмыстық іс қозғапты. Және күдікке ілінген үш азаматты ұстап, Ішкі істер департаментіне жеткізілген. Олар Шымкент қаласының тұрғындары екен. Күдіктілердің қарияға кісіге неге қоқан лоқы көрсеткендерін түсіндіре алмаған.

«Аталған жайт сотқа дейінгі тергеп тексеру тізіміне тіркелді. Өзінше билік ету бабы бойынша тергеу амалдары жүргіліп жатыр. Ұйымдасқан қылмыспен күрес басқармасының қызметкерлері мен жедел іздестіру жұмыстарының барысында күдікті ретінде үш азамат анықталып, Ішкі істер департаментіне жеткізілді. Олар үшеуі де Шымкенттің тұрғындары болып шықты»,-деді ОҚО Ішкі істер департаменті Баспасөз қызметінің жетекшісі Салтанат Қаракөзова.