Әлеумет 31.01.2020 сағат 01:00

«Бала-шағамыз бізге қарап отыр» - Атыраудағы мемлекеттік нысан күзетшілерінің наразылығы (ВИДЕО)

Құқығымыз тапталды деген компания өкілдері тендерді өткізгендердің үстінен шағым түсірген. Одан еш қайран болмаған соң, мемлекет басшысының атына хат та жолдаған.
Бөлісу
Бөлісу
Бөлісу

Атырауда мемлекеттік маңызы бар нысанды күзететін бір топ жұмысшы наразылық білдірді. Олар өздерінің орнына таңдалып алынған компанияға ашулы. Себебі, құрылғанына 5 ай болған күзет фирмасының жұмысшыларында стратегиялық ғимараттарды күзету үшін арнайы техникасы да, қару-жарағы да жоқ. Сол себепті, 2000 шақырым құбырды жалаң қолмен қарауылдамақ. Ал бірнеше жылдан бері еңбек етіп жүрген бұрынғы фирманың тәжірибелі күзетшілері жұмыссыз қаламыз деп алаңдап отыр, деп хабарлайды Skifnews.kz ақпарат порталы, Еуразия бірінші арнасына сілтеме жасап.

Қалада мемлекеттік ғимараттарды қарауылдайтын 30-ға жуық адам жұмыссыз қалуы мүмкін. Көбі 10 жылдан бері осы салада жүрген азаматтар. Жартысынан астамы зейнет жасына жақындап қалған екен. Енді бір топ күзетші аяқасты жұмыстан шығып, онсыз да мардымсыз жалақымыздан қағыламыз ба деп отыр.

«Біз осы мекемеде жұмыс істейміз. Бала-шағамызды асыраймыз, кредитіміз бар. Бізге жұмыс болғаны жақсы. Басқа мекемеге ауысатын болсақ, олардың құрал-саймандары жоқ. Осы мекемеге біз үйреніп қалғанбыз. Жұмыс керек. Енді қанша жылдан бері істеп келе жатырмыз. Үйреніп қалған жеріміз, басқа қайда барамыз? Бала-шағамыз бізге қарап отыр», -дейді күзетші Сағынтай Ащамов.

Оған себеп жуырда ғана өткізілген тендер екен. Ол жерде мемлекеттік ғимараттарды күзетуге басқа компания жеңімпаз деп танылыпты. Ал ол жаңадан таңдалып алынған жұмысшылардың стратегиялық маңызы бар нысанды күзетуге, арнайы көліктері, тіпті, құралдары да жоқ екен. Осында талай жыл еңбек еткен тәжірибелі күзетшілер, аяқасты «екі қолға бір күрек таппай» қалайын деп тұр.

«Біздің аймақта күзет қызметі жақсы жолға қойылған. Бұған дейін біздің нысанды басқа компания күзеткен. Бұл күзет компаниясы 2018 жылдан бері жұмыс істеп келеді. Қазіргі кезде алдыңғы өткен тендердің күші жойылып, басынан тендер жарияланды. Басынан сатып алу жүргізіледі. Барлық процедура жасалды, енді жұмыстар қайтадан жалғасады», - деді «Магистральді суағызғы» ЖШС-нің басшысы Мадияр Берлібаев.

Тендерде жеңіске жеткен күзет фирмасының тиісті құралдары жоқ екенін нысандарды бұған дейін күзеткен компания өкілдері де растап отыр. Қазір олар дәл осындай олқылық жібергені үшін конкурсты ұйымдастырғандардың үстінен шағым түсіріпті. Ал бұрынғы тендердің күші жойылған.

«2019 жылдың желтоқсан айында өткізілген тендердің қорытындысы бойынша, «Тұран Секьюрити» күзет компаниясы жеңіске жетті. Бірақ, олардың нысанды күзетуге арналған құралдары толық емес. Сонда да, бұл компания қажетті құжаттарды өткізбесе де жеңімпаз ретінде танылған. Біз содан кейін шағым түсірдік. Қазір конкурстың күші жойылды», - дейді «Сұңқар Секьюрити» ЖШС-нің келісімшарт бойынша маманы Наталья Касанова.

Құқығымыз тапталды деген компания өкілдері тендерді өткізгендердің үстінен шағым түсірген. Одан еш қайран болмаған соң, мемлекет басшысының атына хат та жолдаған. Бұл мәселе шешілгенше, арнайы құралдары түгел тәжірибелі жұмысшылар ғимараттарды одан әрі де күзете бермек. Ал жаңа тендер өткізілгеннен кейін олардың тағдыры не боларын уақыт көрсетеді.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар