$ 447.4 € 477.55 ₽ 4.76
Египеттік арабқа күйеуге шыққан қазақ қызы өзінің бұл әрекетін үлкен қателік деп есептейді. Бұл туралы Мысырға барып, қандасымызбен тілдесіп қайтқан профессор, түркітанушы Қаржаубай Сартқожаұлы мәлімдеген. Ғалымның әңгімесі жазылған бейнеролик кеше Фэйсбуктегі парақшалардың бірінде жарияланды.
Қазақ қызы араб жігітімен Алматыдағы Қ.Сәтбаев атындағы ұлттық техникалық университетте бірге оқып, сол жерде танысқан екен. Көңілдері жарасқаннан кейін үйленуді жөн санапты.
Қаржаубай Сартқожаұлы, т.ғ.д., профессор:
- Египеттегі қазақ жігіттерден сұрадым, осында тұрып жатқан қазақ қыздар бар ма деп. Екі қыздың бар екенін айты. Бірінің күйеуі кездесуге рұқсат бермепті, екіншісі келіскен. Соның үйіне бардық. Бес қабатты үй екен, күйеуі қарсы алды да, бізді жөнімізге қалдырды. Содан әрі қызымыз жағдайын айтып, еңіреп қоя берді: "Таныстық. Үйлендік. Бір балалы болдық. Сонымен елге барамыз деп айтты да, Египетке келдік. Сөйтсем, оның екі әйелі бар екен. Самолеттен түскен соң паспортымды алды да қалтасына салды. Содан бері паспортым жоқ. Үйіммен сөйлесейін десем сөйлескізбейді, бәрі бақылауда. Мен қазір түрмедегі адаммын. Келгеннен кейін тағы екі бала таптым. Дүкеннен өзге ешқайда шыға алмаймын. Қазақстанның елшілігінің қайда екенін де білмеймін. Мына қазақ жігіттер келіп, апарайық деп айтты, алайда, ондағылар мені құжатсыз қабылдайды ма, жоқ па белгісіз" деп қарындасымыз мұңын айтты, - дейді профессор.
Ал, қоштасар сәтте арабқа күйеуге шыққан қазақ қызы елдегі сіңлілеріне сәлемдемесін де жолдапты.
- Кетер кезде ең соңғы айтқан сөзі мынадай болды: "Аға, сіз жоғары оқу орнында ұстаз екенсіз, қазақтың қыздарына айтыңызшы, басы таз, мұрны пұшық болса да қазақ жігітіне шықсын. Еш уақытта басқа ұлтқа шықпасыншы. Осыны жүрген жеріңізде айтып жүріңізші, аға. Мен сізге тапсырар жалғыз өтінішім осы" деп қарындасымыз жылап қалды.
Айта кетейік, Қаржаубай Сартқожаұлы Тарих ғылымының кандидаты, профессор. Л.Н. Гумилев атындағы ЕҰУ-нің жанындағы Түркітану, алтайтану ҒЗИ директоры. «Қош бол, апа!», «Қыранның қазасы», «Сәйгүліктер» атты көркем прозалық кітаптардың, 100-ге жуық ғылыми мақалалардың авторы.
Естеріңізге салайық, жуырда ғана түрік жігітіне күйеуге шыққан қазақ қызы өзінің бұл әрекетіне өкінбейтінін, бақытты өмір сүріп жатқанын айтып, отандық БАҚ өкілдеріне сұхбат берген болатын.
