Қоғам   22.08.2017   сағат   08:26     380

ОҚО-дан солтүстікке 36 отбасы жолға шықты

Қазақстанның солтүстік облыстарын қазақыландыру, жергілікті халық санын көбейту және тұрғындардың әлеуетін арттыруға орай оңтүстік халқын еліміздің солтүстігіне көшіру жұмыстары жалғасуда. Аталған жобаның мақсаты тек солтүстік облыстарының тұрмыс-тіршілігіне қан жүгірту ғана емес, сонымен қатар, ОҚО-дағы жұмыссыздық проблемасын шешу. Халқы ең тығыз орналасқан облыс болғандықтан мұнда қазір екі қолға бір күрек таппай жүргендер көбейіп келеді. Ал, солтүстік облыстарда керісінше, жеке кәсіппен айналысатын халық аз.

ОҚО-дан солтүстікке 36 отбасы жолға шықты

Осы орайда айта кету керек, жыл соңына дейін оңтүстіктен солтүстікке 2 мыңнан астам адамның қоныс аударуы күтіліп отыр. Сол көштің алды күні кеше жолға шықты. Артынып-тартынып көшуге бел буғандарды туған-туыстары мен ОҚО әкімдігінің өкілдері шығарып салды. Олардың ішінде әзірге екі отбасы Ақтоғай ауданына қоныс аударуға барса, қалғандары ондағы жағдаймен танысып, мүмкіндіктерді қарастырып алмақ ниетте.

Сарыағаш ауданы Абай аулының тұрғыны Сейдалы Әшірбаев осыдан бір ай бұрын аталған ауданға барып, ондағы тыныс-тіршілікті көзбен көріп қайтыпты. Тұрғынның айтуынша, аудан ауыл шаруашылығын дамытуға сұранып тұр. Ендігі жерде ол қолайлы ауа райы мен құнарлы жерді, сақадай сай техникаларды пайдаланып егін егуді жоспарлап отыр.

Солтүстікке бет бұрған азаматтарды облыстық жұмыспен қамтуды үйлестіру және әлеуметтік бағдарламалар басқармасының басшысы Мұхит Отаршиев бастаған топ шығарып салды. Басқарма басшысының айтуынша, биылғы жылы 113 отбасы солтүстікке көшкен. Облыс тұрғындары еліміздің жұмыс көзі көп аймақтарына қоныс аудару шарасы аясында отбасылар солтүстіктің Айыртау, Ақжар, Жұмабаев, Есіл және Уәлиханов аудандарына барып қоныстанады. Таңдалған Павлодар, Қостанай, Солтүстік және Шығыс Қазақсан облыстарына көшіп барғандардың ішінде күнгей жұртының үлесі басым дейді басқарма мамандары. Олардың дені сонда ауыл шаруашылығын саласын түлетіп отыр.

Айта кетейік, облыстан Солтүстік аймаққа көшуге ниет білдіргендер саны көбейіп келеді. Салаға жауаптылар қоныс аударған азаматтар алдымен баспанамен қамтылып, жұмысқа орналастырылады дейді. Биыл қоныс аударған отбасының әрбір мүшесіне  айлық есептік көлемінде, яғни шамамен 80 мың теңге бір реттік көмек беріледі. Сонымен қатар, бір жылға дейін тұратын үйдің жалдау ақысы мен коммуналдық төлемдері өтелетін болады.

Соңғы жаңалықтар