Қоғам 17.11.2017 сағат 08:29  1136

Алматының сейсмикалық картасы жаңартылуда

Алматы өңірі елімізегі ең сейсмикалық өңірлердің бірі болып есептеледі. Қала тұрғындарының өзі жеңіл жерасты дүмпулерін жиі сезінетіні де жасырын емес. Қала мен облыс аумағында бұл үйреншікті жағдай. Сондықтан, «Алматы-2020» мемлекеттік бағдарламасына дәл осы сейсмикалық қауіпсіздік мәселесі еніп отыр.

Алматыны 2020 жылға дейін дамытуға арналған бағдарламаның басым бағыттарының бірі – тұрғындардың қауіпсіздігі. Бағдарламадағы осы үлкен бөлімде Алматының сейсмикалық қауіпсіздігіне де ерекше мән берілген.

Күні кеше Алматыда тағы да жерасты дүмпулері сезілді. Төтенше жағдай департаментіндегілер бұл дүмпулерге әлсіз деген баға беріп отыр. Жер сілкінісі кеше таңғы сағат 7.42-де сезіліп, 2 балдық көрсеткішті құраған. Дүмпу эпицентрі қаладан оңтүстікке қарай 145 шақырым жерде орналасқан Қырғызстан аумағында жатыр.

Қалалық төтенше жағдайлар жөніндегі департамент басшысы жалпы Алматы өңірінде мұндай жер асты дүмпулері жылына шамамен 200 рет болып тұратынын айтты. Брифингте Алматының сейсмикалық картасы жаңартылып жатқаны белгілі болды. Оның негізінде қаладағы ғимараттардың сейсмикалық жағдайы тексеріліп, нысандар құжаттандырылады. Бұл жоба құзырлы орындармен мақұлданып, бұл үшін қазынадан 800 миллион теңге бөлінген.

«Биыл қаладағы нысандарды құжаттандыруға 800 млн теңге бөлінді. Мердігер де анықталды. 7 мың 27 ғимаратты тексеру үшін 714 млн теңге бөлу туралы келісім шарт жасалды. Мұндай зерттеулердің нәтиежесінде құрылыс ережелеріне өзгерістер енуі де мүмкін”, - деді Алматы қаласы Төтенше жағдайлар департаментінің басшысы Серік ӘУБӘКІРОВ.

2020 жылға дейін қаладағы 183 нысанды сейсмотұрақты ету жоспарланыпты. Соңғы екі жылда 51 нысан сейсмикалық тұрғыда беріктелген. Көбіне бұлар әлеуметтік ғимараттар, мектептер мен емханалар. Нысандардың жер сілкінісіне төтеп беру күші кейінгі бес жылмен салыстырғанда бір жарым есеге өссе керек. Сондай-ақ халық қауіпсіздігі үшін ескі үйлерді сүру бағдарламасы аясында 56 үй қайта тұрғызылған.

Айта кетейік, жуырда Алматы әкімі Бауыржан Байбек шаһардағы әлеуметтік нысандардың сейсмоқауіпсіздігін тексеру мақсатында бірнеше мектеп пен балабақшаны аралап көрген болатын.

Соңғы жаңалықтар