Тоқаев Өзбекстан президентін жалпыхалықтық референдумның сәтті өтуімен құттықтады

Мемлекет басшысы Қасым-Жомарт Тоқаев Өзбекстан Президенті Шавкат Мирзиёевпен телефон арқылы сөйлесті, деп хабарлайды Ақорданың баспасөз қызметі.

Әңгімелесу барысында Мемлекет басшысы Қасым-Жомарт Тоқаев Президент Шавкат Мирзиёевті Өзбекстан Республикасының Конституциясына өзгерістер енгізу жөніндегі жалпыхалықтық референдумның сәтті өтуімен құттықтады.

Қасым-Жомарт Тоқаев жалпыұлттық таңдау еркінің қорытындысы Президент Шавкат Мирзиёевтің стратегиялық бағдарына өзбек халқының зор сенім білдіріп, қолдағанының дәлелі екенін атап өтті.

Қазақстан мен Өзбекстан президенттері екі ел арасындағы стратегиялық серіктестік пен ынтымақтастықты нығайтуға ниетті екенін тағы да растады.

Мемлекеттер басшылары қазақ-өзбек қатынастарының қарқынды дамып келе жатқанын атап өтіп, бұған дейін қол жеткізілген уағдаластықтарды жүзеге асыру мәселесін талқылады.

Сондай-ақ президенттер алдағы уақытқа жоспарланған іс-шаралар кестесін қарастырды.

Өзбекстанда Конституцияға өзгерістер енгізу жөніндегі жалпыхалықтық референдум өткен болатын.

ОСК төрағасы Зайниддин Низамходжаев мәлімдеуінше, Өзбекстандағы референдумда дауыс бергендердің 90%  дан астамы ел конституциясына енгізілген түзетулерді қолдаған.

«Алдын ала мәліметтер бойынша, азаматтардың 90,21%- ы «қолдап», 9,35%-ы «қарсы» дауыс берді, бюллетеньдердің 0,49% -ы бүлінген және жарамсыз деп танылды», - деді ол брифингте.

Алдын ала есептеу бойынша, сайлаушылардың келу көрсеткіші 84,54% құрады. Референдумға 19 миллионнан астам азаматтан 16,6 миллионнан астам адам қатысқан.