Үкіметке нақты шешімдер мен әрекеттерді қажет ететін мықты адам керек

Бүгін Мемлекет басшысы «Қазақстан Республикасының Үкіметі туралы» Жарлыққа қол қойды. Үкімет отставкаға кетті.

Қазақстан үкіметінің 2024 жылдың 7 ақпанына жоспарланған кеңейтілген отырысына дейін отставкаға кеткені осыған дейін хабарланған еді. Шара барысында еліміздің 2023 жылға арналған әлеуметтік-экономикалық дамуының қорытындысы шығарылып, алдағы кезеңдегі негізгі міндеттер айқындалады.

Премьер-министр міндетін уақытша Роман Скляр атқарады.

Мемлекет басшысы халық үшін ең жақсысын жасауға бар күшін салатыны сөзсіз. Сондықтан, ол, әрине, ең сенімді және адал адамдарға сүйенеді.

Үкімет басшысына халықтың қажеттіліктеріне және тапсырмаларды орындауға бағытталған жұмысты ұйымдастыра алатын қатал және прагматикалық адам қажет.

Жалпы, кабинет жұмысында өзгерістер қажет. Енді Үкіметке нақты шешімдер мен әрекеттер және оны ұйымдастыра алатын адам қажет.

Осы орайда ҚР президентінің баспасөз хатшысы Берік Уәли Қазақстанның премьер-министрі қалай тағайындалатынын айтты.

Конституцияға сәйкес, Тоқаев биліктегі "Аманат" саяси партиясы ұсынған кандидатураны қарайды.

"Егер мақұлданса, мемлекет басшысы келісім беру үшін премьер-министрдің кандидатурасын парламент мәжілісінің қарауына енгізеді. Мәжіліс келіссе, президент бұл қызметке жаңа премьер-министрді тағайындайды. Осыдан кейін Қазақстан Республикасы үкіметінің құрамын қалыптастыру процесі басталады", деді Берік Уәли.

Мәжіліс депутаты Кенжеғұл Сейітжан Үкімет отставкасына қатысты пікір білдірді.

Оның айтуынша, министрлер арасында халықтың мұң-мұқтажын тыңдайтындар аз.

«Үкіметтің жұмысын айтар болсақ, әріптестеріммен келісемін. Шынымен де жайбарақат отырған министрлер мен Премьер-Министр сияқты. Халықтың нағыз мұң-мұқтажын тыңдайтын министр аз. Оларды Үкімет басшысы тыңдамай отыр деп санаймын», — деді Мәжіліс депутаты Кенжеғұл Сейітжан. 

Ал Мәжіліс депутаты Нұрлан Әуесбаев "сөзі мен ісі сәйкес келмей тұр" деп Үкіметтің отставкаға кетуіне қатысты пікір қосты.

«Үкімет түрлі есептерді жариялап жатыр. Шын мәнінде, біздегі қымбатшылық өршіп барады. Елімізде азық-түлік, жанармай, автокөлік тым қымбат. Жалпы, осы жағдай халыққа ауыр тиіп отыр. Дегенмен, кейбір бағыттарда оңтайлы өзгерістер бар. Атап айтқанда, Президент Қасым-Жомарт Тоқаев көптен күткен реформаларды бастады. Осы тарихи кезеңдегі осы керемет шешімдерді тиісті деңгейде (Үкіметтің) жүзеге асырмауы салдарынан белгілі бір қиындықтар байқалып отыр. Халықтың ойындағы түсінбеушілік осының салдарынан болады. Өйткені, іске асырылып жатқан ауқымды реформалар бір жағынан дұрыс жеткізілмесе, екінші жағынан – Үкіметтің сөзі мен ісі сәйкес келмей тұр. Қазіргі жағдай бойынша геосаяси немесе басқа себепке сілтеп жатады, бірақ мәселені түпкілікті қарау керек», - деді Н. Әуесбаев.