$ 448.15  483.46  4.86

Көкшетауда «Ақ жол» партиясы кәсіпкерлердің проблемаларымен танысты

Қазақстанда онға жуық саяси партия болғанымен, олардың тек үшеуі ғана Мәжілістен орын алғаны белгілі. Атап айтқанда, «Нұр Отан», «Ұлттық коммунистер» және «Ақ жол» партиялары Парламенттің төменгі палатасына өз мүшелерін депутат етіп бекітіп алған.

Осы саяси ұйымдардың міндеті Парламентте заң жобаларын қарап, оларды талқылау және мақұлдау ғана емес, ең басты міндеті – өз сайлаушыларының проблемаларын тыңдап, мәселелердің шешімін табуына атсалысу. Бүгінде осы міндетін атқару үшін Мәжіліс депутаттары ел аралап жүргені белгілі. Жазғы каникулдың уақытын пайдаланып халық қалаулылары өз өңірлеріне барып, жергілікті тұрғындардың проблемаларына құлақ асуда.

Ал, Мәжілістегі «Ақ жол» фракциясының өкілі Меруерт Қазбекова болса өз партияластарымен бірге Ақмола облыстық кәсіпкерлер палатасында бизнес өкілдерімен кездесу өткізіп, олардың арыз-шағымдарын тыңдады.

Алдымен, депутат Парламенттегі жұмысы жайлы хабарлама жасады. «Ақ жол» партиясының фракциясы қаншама бастамаларға ұйытқы болды. Депутаттық сауалнамалар бойынша да жасалған жұмыстарды саралады. Алдағы сессияларда атқарылатын шараларды да тілге тиек етті. Оның ішінде салық төлемдері туралы заң жобасын қарау маңызды болып табылады.

Кәсіпкерлердің алды болып Еңбекшілдер ауданында орналасқан «Қазгерқұс» кәсіпорнының басшысы Борис Оздоев мемлекеттік субсидиялау жөніндегі бағдарламаның жүзеге асырылу барысындағы түйткіл жайлармен бөлісті. Оның айтуынша, мұндай жаңа бағдарламалар өте көп. Бірақ, бөлінген қаржы көлемі көңіл көншітпейді. Мысалы, бір терімен бір тонды да, бірнеше тонды да тігуді ұсынғандай көрініс.

Халық қалаулысы ауыл шаруашылығы саласындағы субсидиялау мәселесін жүйелеу аса қажет екенін атап көрсетті. Жергілікті осыған жауап беретін мемлекеттік органдардың өкілдері қазір өткен жылға субсидия төленіп жатқанын, енді биылға межеленген қаражат толық игерілетінін айтты. Кейбір болашағы жоқ жобалардан қаражат тиімділігі мол салаға аударылып жатқанынан да хабардар етті.

Көкшетаулық кәсіпкер Владимир Свидерский жанармай саласындағы жөнсіздіктерді айтып, шағымданды. Жанармай өткізетін кәсіпорындарға мемлекеттік тапсырыс кезінде жақындағы Павлодардан емес, батыс өңірлердегі мұнай зауыттарынан өнім алуға мәжбүрлейді. Бұл мұндай кәсіпорындарды шығынға ұшыратады.

Атбасардан келген жеке кәсіпкер Дин-магамед Асаев үн үктіретін диірмендерде жергілікті шикізат жоқтығын ашына айтты. Сапалы бидай өнімдері шетелге экспортқа жөнелтіледі. Осының кесірінен жергілікті диірмендер тек 60 пайыз қуатында ғана жұмыс істеуге мәжбүр. Бұл жұмыс орындарын да қысқартуға әкеліп соғады.

Ең өкініштісі, сапалы шикізат болмағандықтан, кәсіпкерлер ұн үктіру кезінде оған әртүрлі химиялық қоспалар қосады. Сонда астықтың астында тұрып, сапалы өнімді сыртқа тасып, өз халқымыз сапсыз, химиялық қоспасы көп өнімді тұтынуға тура келеді.

Енді бір шеке шаруалар мал өсіруге жергілікті жерде жайылымдық жер жоқ екендігін жеткізді. Бұл мал өсіруге ынталы шаруалардың аяғына оралғы болып отыр. Басқа аймақтардан бөлінген жерге шаруалар бәрін тастап барғысы жоқ. Депутат Меруерт Қазбекова бизнеспен айналысу үшін барлық тәуекелге бару керек екендігін ескертті. Оңай олжа табу оңайлықпен келмейді ғой.

Кездесу барысында ол қандай мәселе болсын бірлесіп шешуге болатынын баса айтты. Ол үшін жергілікті кәсіпкерлер палатасына жүгініп, сол арқылы жоғарыға мәселені жеткізсе, бұлай жағдай күрделенбес еді. Халық қалаулысы өз тарапынан барлық түйткіл мәселелерді шешуге атсалысатынын да айта келіп, осындай өңірлерге сапары барысында қаншама өзекті жайларға қанығатынына жұрт назарын аударды.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары