$ 444.22 € 476.38 ₽ 4.82
Ресейдің танымал тележурналисті, шоу-бизнес өкілі Ксения Собчак Ресей президенті қызметіне өзін ұсынғанын ресми түрде жариялады. Тележүргізушісі бес жылдан бері оппозиционерлермен бірге екенін, ондаған мың адам өзгеріс талап етіп митингке шыққанымен, елде оң өзгерістер болмай отырғанын айтты.
"Ұрылар мен жемқорлар өтірік айтуын, ал билік басындашылар ұрлауын доғарар емес", - деп мәлімдеді Собчак. Ол президенттік сайлауға қатысу арқылы "барлығына қарсы дауыс беру" мүмкіндігін сайлаушыларға ұсынуды көздейді. "Ксения Собчак – барлығына қарсы үміткер", – деп мәлімдеді тележүргізуші.
Собчактың президенттік сайлауға үміткер болатыны қыркүйек айының басында белгілі болды. БАҚ мәліметіне қарағанда, тележүргізуші президент Владимир Путин әкімшілігінің рұқсатымен сайлауға бара жатыр.
Собчактың өзі Кремльмен келісімі бар дегенді жоққа шығарды. Сайлауға қатысқысы келетін оппозиционер Алексей Навальный тележүргізушіні сынап, "карикатуралық либерал үміткер" деп атады. Собчак Навальныйды оппозицяның ыдырауына айыпты деп сынады, дегенмен "күш біріктіруге" шақырды.
Петербургтың бұрынғы басшысы Анатолий Собчактың қызы 2004 жылдан бері ТНТ телеарнасының "Дом-2" шоуын жүргізген. Жақында Собчактың әкесі туралы деректі фильм түсіретіні, оған Ресей президенті де қатысатыны белгілі болды.
Дереккөз: Азаттық
