«Сен қайда жоғалып кеттің, апа?»: анасы 3 жыл бұрын қайтыс болған қызымен кездесті (ВИДЕО)

Оңтүстік Корея тұрғыны жеті жасында сирек кездесетін аурудан қайтыс болған қызы Найонды қайта көріп, тіпті, туған күнін атап өтті, деп хабарлайды Stan.kz, Independent-ке сілтеме жасап.

Чан Чжи Сун «Мен сені кездестірдім» атты деректі фильмнің түсіріліміне қатысты, онда түсірілім тобы оны қайтыс болған қыз баламен кездестіруді ұйымдастырды. Жоба бойынша, жұмыс сегіз айдан бері жалғасып жатыр. Сонымен қатар, оларға кішкентай актриса көмектесті.

Чан Найонның өліміне алаңдады. Оның денесінде қызының аты мен туған күні жазылған татуировкасы бар, ал мойнында баланың сүйек ұнтағы салынған алқасы жүр. Ол айына бір рет Найон жерленген зиратқа барады.
Жоба аяқталғаннан кейін әйелге VR бас киімі және қолғап кигізілді. Анасы мен қызының кездесуі олар жиі серуендеген саябақта өтті.

Найон анасына: «Сен қайда жоғалып кеттің, апа? Сен мені сағындың ба?» - деді. Көз жасын баса алмаған Чан қолын ақырын созып, қолғаптың көмегімен қызының алақанына тигенін сезді. Содан кейін екеуі Найонның туған күнін атап өтті. Туған күніне арналған тортқа шамдарды жақты. Қыз анасының бұдан былай жыламауын тіледі. Чан Чжи Сун баласынан, ағасынан немесе ата-анасынан айрылғандарға қолдау көрсету үшін деректі фильмге қатысқанын айтты.

«Үш жыл өтті [қайтыс болғаннан кейін], енді мен оны одан сайын жақсы көруім керек, зардап шекпеуім керек деп санаймын. Сондықтан кейін оны қайтадан кездестіргенде өзімді сенімді сезінуім керек. Мен шоуды көргеннен кейін көптеген адамдар Найонды есіне алады деп үміттенемін», - деп жазды Чан өзінің блогында.

«Мүмкін бұл нағыз жұмақ болған шығар. Мен қысқа, бірақ, өте бақытты уақыт болса да, мені күлімсіреп қарсы алған Найонмен кездестім. Менің арманым орындалды деп ойлаймын», - деді әйел.

Технология әлі жетілмеген, бірақ, жақын арада VR-де қайтыс болған туыстарымен қарым-қатынас қазіргі қоғамда қалыпты жағдайға айналуы мүмкін. Сонымен қатар, бірнеше стартаптар қазірдің өзінде қайтыс болған отбасы мүшелерімен виртуалды шындықта сөйлесуге мүмкіндік беретін қызметтерді кәсіби деңгейде құрумен белсенді айналысады.

Осы технологияны қолданудың салдарын болжау қиын. Мүмкін, бұл жақын адамынан айрылған адамға көмектеседі және алға қарай жүруге күш береді. Біреу виртуалды әлемге тәуелді болып, оған шынайы өмірден гөрі көбірек уақыт жұмсауы мүмкін.

Кейбір сарапшылар болашақта қайтыс болған адамдармен байланыс VR-ден асып кетеді, ал қоғамда қайтыс болған туыстарын виртуалды емес, нақты әлемде «бейнелейтін» арнайы андроид роботтары пайда болады деп болжайды.