Тоқаев Пәкістан Президентіне көңіл айту жеделхатын жолдады

Қазақстан Республикасының Президенті Қасым-Жомарт Тоқаев Пәкістан Президенті Ариф Алвиге көңіл айтты, деп хабарлайды Skifnews.kz ақпарат порталы Ақорданың баспасөз қызметіне сілтеме жасап.

Мемлекет басшысы Қазақстан халқының және жеке өзінің атынан Карачи қаласының «Джинна» халықаралық әуежайы маңында апатқа ұшыраған ұшақта қаза тапқан және зардап шеккен адамдарға байланысты Пәкістан Президенті Ариф Алви мен сол елдің халқына көңіл айтып, жеделхат жолдады.

«Жантүршігерлік апатта жақындарынан айырылған отбасылардың қайғысына ортақпын. Қаза қайырлы болсын. Жаратқан марқұмдардың жатқан жерін жайлы етсін. Ал жарақат алғандардың тезірек сауығып кетуіне тілектеспін», – делінген жеделхатта.

Естеріңізге сала кетсек, Pakistan International Airlines (PIA) жолаушылар ұшағы Карачи қаласына жақын маңда апатқа ұшыраған еді. Бортта жүзге жуық жолаушы болған.