Іле-Алатау ұлттық саябағындағы сыбайлас жемқорлыққа қатысты тергеу басталды

Заңгер Бақытжан Базарбек «Іле-Алатау ұлттық табиғи паркі» мемлекеттік ғылыми-өндірістік кәсіпорнындағы жемқорлық ісіне қатысты тергеу басталғанын хабарлады, деп жазады Орда.кз.

Іле-Алатау ұлттық паркінің лауазымды тұлғаларына қатысты қылмыстық іс қозғалды.

 «Сыбайлас жемқорлыққа қарсы қызметтің Алматы облысы бойынша Өңіраралық тергеу департаменті «Іле-Алатау ұлттық табиғи паркі» мемлекеттік ғылыми-өндірістік кәсіпорнының лауазымды тұлғаларына қатысты жер телімдерін иеліктен шығаруға заңсыз рұқсат беру фактісі бойынша сотқа дейінгі тергеп-тексеруді бастады. Бұл іс қонақ үйледі салуға келісім-шарт жасасумен байланысты «күдікті схемалар», сондай-ақ экопостарда бюджет қаражатын жымқыру фактілері бойынша», – деп жазды Базарбек Facebook-тегі парақшасында.

Толық ақпаратты кейінірек Жемқорлыққа қарсы баспасөз қызметі жариялайды.

2019-2020 жылдары Бақытжан Базарбек Алматы облысының Талғар, Еңбекшіқазақ аудандарында мемлекеттік ұлттық ғылыми-өндірістік кәсіпорнының жер телімдерін заңсыз иеліктен шығару фактісі бойынша жеке тергеу жүргізген. Ол үшін ұлттық парк шекарасында орналасқан жер телімдерінің 115 кадастрлық нөмірінің тізілімін жасау керек болды. 2003 жылдан кейін ұлттық парк аумағында тікелей әкімшілікпен жасалған «солақай» келісімдер негізінде салынған ондаған қонақ үйлері бар аймақ пайда болғаны белгілі болды. Аталған құжаттардың ұсынылуының заңдылығына әлі күнге дейін прокуратура мен жердің пайдаланылуы мен қорғалуын бақылау жөніндегі уәкілетті орган тарапынан баға берілген жоқ және Ұлттық парк тарапынан сотта дауланбаған.

 «Мен Алматы облысы бойынша Сыбайлас жемқорлыққа қарсы іс-қимыл департаментіне сыбайлас жемқорлыққа қарсы тексеру жүргізу және сотқа дейінгі тергеуді бастау туралы өтініш бердім. Есімде сол кезде сотқа дейінгі тергеуді бастауға облыстық жердің пайдаланылуы мен қорғалуын бақылау департаментінің даулы қорытындысы кедергі болды» деп толықтырды адвокат.

Бұл ретте Базарбек, сол кезде қылмыстық іс қозғау мүмкін болмағанына қарамастан, қоғамдық резонанстың нәтижесі бойынша «Азаматтарға арналған үкімет» КЕАҚ басшылығымен жұмыс тобы құрылып, жер Алматы облысы бойынша инспекция департаменті ұлттық саябақтағы жер телімдерінің 115 кадастрлық құжаттарын талап етіп, зерделеді.

 «Мен атап өткен материалдардың барлығы жақын арада Сыбайлас жемқорлыққа қарсы қызметке беріледі» деп толықтырды Бақытжан Базарбек.

Бұған дейін Экология, геология және табиғи ресурстар министрі Серікқали Брекешев Көкжайлау трактінің жерлері жыл соңына дейін Іле-Алатау ұлттық паркіне қайтарылатынын айтқан болатын.