$ 449.3  489.69  4.89

Тоқаев кәсіпкерлерге Қазақстанда тапқан ақша елде жұмсалуы керектігін ескертті

Болашағыңызды Қазақстанмен байланыстырсаңыздар, онда өз қаражатыңызды елге қайта инвестициялауыңыз керек. Қазақстан алдындағы әлеуметтік және саяси жауапкершілігіңіз – осы.
Фото: ашық дереккөз
Фото: ашық дереккөз

Президент Қасым-Жомарт Тоқаев кәсіпкерлермен кездесуде мемлекет барлық инвестициялық міндеттемесін бұлжытпай орындайтынын тағы да баса айтты, деп жазды turkystan.kz.

«Шетелдік инвестициялар үшін күрес шиеленіскен қазіргі жағдайда ішкі резервтерге барынша сенім артуымыз керек. Әңгіме отандық компаниялардың қаражаты туралы болып отыр. Болашағыңызды Қазақстанмен байланыстырсаңыздар, онда өз қаражатыңызды елге қайта инвестициялауыңыз керек. Қазақстан алдындағы әлеуметтік және саяси жауапкершілігіңіз – осы. «Осында ақша табамын, басқа жақта жұмсаймын» деген қағидат бұдан былай болмауы керек», – деді Мемлекет басшысы.

Президенттің айтуынша, бұл ретте жұмыс екі бағыт бойынша жүргізіледі – капиталды елге қайтару немесе капиталды елге қайтаруды ынталандыру, сондай-ақ оффшорға қаржы кетуіне тосқауыл қою.

«Мұндай механизмдер әлемнің көптеген елінде қолданылады, біз де осы бағытта жүруіміз керек. Бұл жерде банктерді осы жұмысқа қалай тарту керек екенін түсіну қажет. Қаражат нарықтағы алыпсатарлыққа емес, нақты экономика айналымына түсуі керек. Кәсіпкерлеріміз өздерінің тікелей және басты қызметі ретінде нақты бизнес-жобаларға несие бере бастауы үшін нені түзету керек? Әрине, мәселе қиын, оны түсінемін, бірақ оны шешу керек. Қазір бұл – экономикалық өзгерістердің негізгі тежегіші», – деді Қасым-Жомарт Тоқаев.

Мемлекет басшысы табиғи байлығымызды барынша тиімді пайдалану қажет екенін айтты. Үкіметке барлық кен орнына тексеру жүргізу, шетелдік және жергілікті инвесторларды тарта отырып, оларды одан әрі игеру үшін пайдаланылмайтын кен орындарын анықтау тапсырылды.

Сондай-ақ қаржылық реттеу агенттігіне Үкіметпен бірлесе отырып, цифрлық платформа мен инфрақұрылымды құру, дағдарысқа ұшыраған активтерді сатып алу-сату бойынша нарық қалыптастыру, оларды сатып алу үшін жеңілдіктер, оның ішінде салықтық жеңілдіктер жасау тапсырылды.

«Елге инвестиция тартудың тағы бір бағыты мемлекеттік жеке серіктестікті қайта жаңғырту болуы тиіс. Бүгінде бұл тетік мемлекеттік сатып алу рәсімдерін айналып өту құралына айналды. Шамадан тыс артықшылықтар негізсіз беріледі. Міндеттер, кепілдіктер, тәуекелдер мен кірістер бастамашылар мен мемлекет арасында тепе-тең бөлінуі тиіс», – деді Президент.

Жиын барысында Үкіметтің мемлекеттік жеке серіктестікке қатысты жаңа заманауи тәсілдерді әзірлеуі керектігі де ескертілді.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары