Бүгінгі миналар туралы ақпараттардың артында қаңтар оқиғасын ұйымдастырғандар тұруы мүмкін

Қазақстан қалаларындағы түрлі нысандарда бомба қойылған туралы көптеген хабарлама тарады. Бұл жағдайға «Қаңтар оқиғасын» ұйымдастырушылар қатысты болуы мүмкін. Мұндай пікірді порталымызға берген сұхбатында генерал-майор, «Генералдар кеңесі» төрағасы Махмут Телеғұсов айтты, деп жазады Azattyq Rýhy.

«Менің ойымша, қаңтар оқиғасын ұйымдастырушылар өздерінің жеңілгенін мойындағысы келмейді. Меніңше, бұл шабуылдың артында солар тұр, өйткені бұл бұзақылық сияқты емес: мұнда бәрі ұйымдасқан, бірден бірнеше аймақта бір уақытта хабарламалар болды. Мүмкін олар өздерінің әлі де бар екенін көрсеткісі келетін шығар. Олар ақпараттық соғысты жалғастыруда. Олар бәлкім, осылайша әлі де қақтығыстың жалғасатынын білдіргісі келеді. Екінші жағынан, олар азаматтық қоғамға өздерінің күші бар екенін көрсеткісі келеді. Менің пікірім осындай. Қазір қаңтар оқиғаларының қатысушыларына қатысты тергеу болып жатыр, террористерді іздеу және ұстау операциялары жалғасуда. Мұның бәрі қаңтардағы тәртіпсіздіктерді ұйымдастырушылармен байланысты», - деді ардагер.

Сонымен қатар, Телеғұсов құқық қорғау органдарына ескерту жасады.

«Құқық қорғау органдарына бұл алаңдаушылық айла болуы мүмкін екенін ескерткім келеді. Сондықтан қырағылықты ең жоғары деңгейге ұстау керек. Әсіресе, адамдар көп жиналатын жерлерде қауіпсіздік шараларын күшейту қажет», - деді генерал-майор.

Естеріңізге сала кетейік, бүгін Алматы, Семей, Нұр-сұлтан және Қарағанды қалаларында түрлі нысандарда жарылғыш заттардың қойылғаны туралы хабарламалар келіп түсті. Бір ғана Алматының өзінде полиция 7 ғимаратты тексеріп жатыр.