Рим Папасы Францисктің Қазақстан билігінің өкілдерімен, азаматтық қоғам және дипломатиялық корпус өкілдерімен кездесуі екі арадағы түрлі бағыттағы ынтымақтастықты жаңа белеске көтереді. ҚР Президенті Қасым-Жомарт Тоқаев кездесу барысында осындай ой айтты, деп хабарлайды ҚазАқпарат.
«Биыл Қазақстан мен Ватикан арасында дипломатиялық қатынас орнағанына 30 жыл толды. Сіздің сапарыңыз осы мерейлі межеге тұспа-тұс келіп отыр. Біз бұл сапарға айрықша мән береміз. Себебі бүгінгі кездесу түрлі бағыттағы ынтымақтастығымызды жаңа белеске көтереді», - деді Мемлекет басшысы.
Сондай-ақ, Президент дәл қазір әлемдегі геосаяси жағдайдың ушығып тұрғанына тоқталды.
«Біз әлемдік өркениеттің қазіргі ахуалы, жаһандық саясаттың өзекті мәселелері және жалпы діннің мән-маңызы туралы сіздің пасторлық сөзіңізді тыңдауға ықыластымыз.
Қасиетті Рим Папасы, осы мүмкіндікті пайдалана отырып сіздің бүкіл әлемдегі қызметіңізге жоғары баға бергім келеді. Сіз Қазақстанға адамзат тарихындағы айрықша кезеңде келіп отырсыз. Халықтар отбасы жар шетінде тұр деуге болады. Өйткені геосаяси шиеленіс артып, жаһандық экономика зардап шегіп жатыр және этникалық, діни төзімдер арасында толқын-толқынмен ушығып тұр. Бұл тіпті жаңа нормаға айналып барады. Сондықтан түрлі мәдениеттер мен діндердің салиқалы адамдары адамзатты ортақ данышпандықпен және энергиямен әріптестік пен өзара қолдау идеясына біріктіруі керек.