«Бұйыртса, орнына қоямыз»: Жәнібек Әлімханұлы қарсыласына желіде жазба қалдырды

Жеңілмеген жаңазеландиялық қарсыласымен қайтадан жекпе-жек өткізетін Жәнібек Әлімханұлы қарсыласы туралы желіде жазба қалдырды, деп хабарлайды Skifnews.kz ақпарат порталы.

WBO және IBF тұжырымдары бойынша әлем чемпионы Жәнібек Әлімханұлы жеңіліп көрмеген жаңазеландиялық былғары қолғап шебері Андрей Михайловичтің жазасын беруге уәде берді.

“Андрей бала біраз ашуға тиетін қылық жасап жүр. Біраз қазақ жанкүйерлері оған ашулы. Бұйыртса, орнына қоямыз”, – деді Жәнібек. 

Жәнібек ағзасының шаршауына байланысты денсаулығы күрт нашарлап, Андрей Михайловичке (21-0, 13 КО) қарсы жекпе-жекке шыға алмай қалған еді. Мінекей, енді қос спортшының жолы қайтадан түйісейін деп тұр. Орта салмақ дәрежесінде өтетін жекпе-жек келесі айға жоспарланған.

Айта кетейік, Жәнібек Әлімханұлы соңғы жекпе-жегін былтыр қазан айында неміс боксшысы Винченцо Гуальтьериге (21-1-1, 7 КО) қарсы өткізіп, 6-раундта техникалық нокаутпен жеңген еді. Сөйтіп ол IBF тұжырымы бойынша әлем чемпионы атанса, Михайлович сәуірде Аустралияда жергілікті боксшы Лес Шеррингтонды (39-18, 23 КО) бірінші раундта нокаутпен ұтты.