Екі дүркін паралимпиада чемпионы Давид Дегтярев шаңырақ көтерді (ВИДЕО)

Паралимпиада ойындарының екі дүркін чемпионы Давид Дегтяревтің үйлену тойына арналған кортеждің видеосы әлеуметтік желілерде таралып, көпшіліктің назарын аударды, деп хабарлайды Skifnews.kz ақпарат порталы.

Видеода Давид Дегтярев пен қалыңдығы көлік терезесінен саусақтарындағы неке сақиналарын көрсетіп, қуаныштарымен бөліскені байқалады.

Желі қолданушылары жас жұбайларға жылы лебіздерін жаудырып, бақыт пен ұзақ өмір тіледі.

"Қалыңдығы қандай сұлу!", "Біздің Атбасардан шыққан жігіт! Бақытты бол!", "Мықтысың, Давид! Ол өз тағдырын өзі жасады", – деген пікірлер жазылды.

Давид Дегтярев – Атбасардан шыққан пауэрлифтинг шебері. Ол алғаш рет Токио Паралимпиадасындағы жеңісімен әлемді таңғалдырған еді. Ал Франциядағы додадан кейін екі мәрте Паралимпиада чемпионы атанып, Қазақстанның спорт тарихында өшпес із қалдырды.