Темірлан Анарбеков УЕФА марапатына ие болды (ВИДЕО)

22 жастағы Темірлан Анарбеков гректің "Олимпиакос" командасына қарсы өткен матчта үздік ойыншы атанды, алайда ойын нәтижесі Қазақстан командасы үшін сәтсіз аяқталды. 9 желтоқсанда Астанада өткен кездесуде қазақстандық қақпашы қарсыластың бірнеше қауіпті шабуылын тоқтатып, жалпы сегіз сейв жасады, деп хабарлайды Sn.kz ақпарат порталы. 

Алматылық «Қайраттың» қақпашысы Темірлан Анарбеков УЕФА нұсқасы бойынша «Қайрат» – «Олимпиакос» матчының үздік ойыншысы атанды.

«Матчтың үздік ойыншысы болып Темірлан Анарбеков танылды. УЕФА-ның техникалық бақылаушылар тобының айтуынша, оның көптеген сейвтері Олимпиакостың үлкен жеңіске жетуіне жол бермеді», – деп жазды УЕФАның ресми ақпарат көзі.

Бұл "Қайратты" ірі есеппен ұтылудан сақтап қалды.

Ал "Олимпиакос" биылғы Чемпиондар лигасындағы алғашқы жеңісіне қол жеткізсе, "Қайрат" турнирдегі бесінші жеңілісін тіркеді.